ԵՐԵՎԱՆ, 25 հունվարի — Sputnik. Ուկրաինական Gordonua.com էլեկտրոնային պարբերականը, հղում անելով ԵԽԽՎ-ում ուկրաինական պատվիրակ Վոլոդիմիր Արիևի ֆեսբուքյան էջին, գրել է, թե իբր ԵԽԽՎ հայ պատվիրակները փորձել են կաշառել իրեն։
Sputnik Արմենիան փորձեց ճշտել պատգամավորի տարածած լուրի իսկությունը։
ԱԺ հասարակայնության հետ կապերի և տեղեկատվության վարչության պետ Արսեն Բաբայանը, ի պատասխան մեր հարցին ասաց, որ Վոլոդիմիր Արիևին հայկական պատվիրակության անդամները լավ են ճանաչում, նա միշտ էլ եղել է ադրբեջանական քարոզչամեքենայի գործիք:
«Խոսել եմ ԵԽԽՎ-ում հայկական պատվիրակության ղեկավար Հերմինե Նաղդալյանի հետ. նա հերքեց տեղեկությունը: Անձամբ Արիևի հետ Արցախի հարցով չի կարող որևէ քննարկման նույնիսկ փորձ լինել, քանի որ Արիևն ընդհանրապես որոշումներ կայացնելու լիազորություն չունի, իր փոխարեն որոշումները կայացվում են իր տերերի կողմից։ Ինչ վերաբերում է կոնյակին, ապա պետք է նկատել, որ խավիարից հետո կոնյակը հակացուցված է»,-ասաց Արսեն Բաբայանը:
Արսեն Բաբայանը նաև տեղեկացրեց, որ ԵԽԽՎ-ում հայկական պատվիրակները փոխանցել են, որ Վոլոդիմիր Արիևը հաջողությամբ հանձնել է Լուկա Վոլոնտե ակումբին անդամակցելու վերջին ստուգարքը և արդեն այդ ակումբի լիիրավ անդամության թեկնածու է, իսկ Լուկա Վոլոնտե ակումբի անդամները ոչինչ չեն կարող ինքնուրույն որոշել:
