ԵՐԵՎԱՆ, 18 սեպտեմբերի — Sputnik. Սփյուռքի ընդամենը 10 տոկոսն է այցելել Հայաստան, սա ՀՀ տնտեսական զարգացումների և ներդրումների նախարարության զբոսաշրջության պետական կոմիտեի նախագահ Զարմինե Զեյթունցյանի ոչ պաշտոնական տվյալներն են, որոնք նա ներկայացրեց Մարզահամերգային համալիրում կազմակերպված Հայաստան-Սփյուռք համաժողովում իր ելույթից առաջ:
«Իհարկե, դրանք ստուգված տվյալներ չեն, բայց հնարավոր է, որ այդպես լինի: Սփյուռքը մեզ համար առաջին թիրախային շուկան է, Հայաստանը ոչ միայն նրա համար է, որ գան հայրենիք ու իրենց պարտքը կատարեն, այլև գան որպես զբոսաշրջիկ՝ ժամանակ անցկացնելու ու ծանոթանալու հայրենիքի հետ»,- ասաց Զեյթունցյանը:
Նա պատմեց, որ մշտապես ապրել է Սփյուռքի ներսում, իրեն համարում է կրկնակի սփյուռքահայ, քանի որ ծնողներն էլ Հայաստանում չեն ծնվել: Ուստի Զեյթունցյանը վստահությամբ կարող է ասել, որ Սփյուռքում տեղեկատվությունը Հայաստանի մասին շատ քաղաքականացված է:
«Երբ դու այնտեղ ես, տպավորություն է, որ Հայաստանում միայն խնդիրներ են, պատերազմական ու կոնֆլիկտային գոտի է»,- ասաց նա՝ շեշտելով, որ հենց այս ուղղությամբ են նաև աշխատանքներ տանում:
Sputnik Արմենիայի այն հարցին, թե հայաստանյան որ գրավչություններն են ներկայացնում Սփյուռքին, Զեյթունցյանը պատասխանեց՝ Հայաստանն առաջին հերթին գրավում է պատմամշակութային ժառանգությամբ, երկրորդը՝ իր անսահման հյուրընկալությամբ:
Նա պատմեց, որ եվրոպացիները Հայաստանում իրենց զգում են ինչպես տանը, ասիացիները՝ ևս: Մեր առավելությունն այն է, որ Եվրոպայի և Ասիայի խաչմերուկում ենք, ինչը մեզ տալիս է այն ճկունությունը, որի շնորհիվ աշխարհի ցանկացած անկյունից ժամանած մարդ իրեն զգում է ինչպես տանը:
