ԵՐԵՎԱՆ, 18 սեպտեմբերի — Sputnik. Նպատակ կա, որ Հայաստանը տարիներ անց ունենա առնվազն 4 միլիոն բնակիչ: Այս մասին ասաց Հայաստանի Հանրապետության նախագահ Սերժ Սարգսյանը Հայաստան-Սփյուռք համաժողովի բացման ժամանակ:
«Մենք հայտարարել ենք` մեր նպատակն է, որ Հայաստանը 2040 թվականին ունենա առնվազն 4 միլիոն բնակիչ: Առաջիկա բոլոր տարիներին մեր քայլերն ուղղվելու են Հայաստանում բնակչության բնական աճի տեմպերի ավելացմանը, արտագաղթի և ներգաղթի հարաբերակցության էապես վերափոխմանը»,-ասաց նախագահը:
Նա չթաքցրեց, որ մեր երկրում ժողովրդագրական միտումները խիստ մտահոգիչ են և քառորդդարյա օբյեկտիվ և սուբյեկտիվ բազմաթիվ գործոնների հետևանք են:
«Միայն ծնելիության մակարդակի ավելացման, մարդկանց կյանքի տևողության երկարացման և ժողովրդագրական պատկերը բարելավող մյուս քայլերով մենք մեր նպատակին դժվարությամբ կհասնենք, բայց այդ ուղղություններով հաստատակամորեն առաջ ենք գնալու»,- ասաց նախագահը:
Սարգսյանի վստահեցմամբ՝ հաջորդ Հայաստան-Սփյուռք համաժողովը լինելու է «4 միլիոնանոց Հայաստան» ծրագրի համահայկական քննարկման հավաքն ու դրա իրականացման ընթացքի իրական սկիզբը։
