ԵՐԵՎԱՆ, 18 սեպտեմբերի — Sputnik. Հայաստան-Սփյուռք համահայկական համաժողովը մեկնարկեց: Բացման խոսքով հանդես եկավ ՀՀ Սփյուռքի նախարար Հրանուշ Հակոբյանը: Նա սփյուռքի հայրենակիցներին հպարտությամբ հայտարարեց՝ բարով եք եկել ազատ ու անկախ Հայաստան, ձեր հայրենիք:
«Իրականություն են դառնում համահայկական հայաշունչ այս մեծ հարթակի աշխատանքները: Ուղիղ երեք տարի է անցել նախորդ համաժողովից: Մենք այս ընթացքում ի մի ենք բերել բոլոր առաջարկությունները, դիտողությունները»,-ասաց նախարարը:
Նա շեշտեց, որ հիմք են ընդունվել բոլոր առաջարկությունները, դրանք փոխանցվել են բոլոր նախարարություններին, համայնքային կազմակերպություններին: Այս մարմինները մշակել են ծրագրեր, որոնք գրքույկի ձևով ներկայացված է սփյուռքի ներկայացուցիչներին:
«Այս համաժողովին մասնակցելու են եկել հայազգի մոտ 1800 անհատականություն`աշխարհի տարբեր երկրներից: Ներկա են հարյուրավոր համայնքային կազմակերպությունների ղեկավարներ: Ողջունում ենք նաև հայ եկեղեցու ներկայացուցիչներին»,-ասաց Հրանուշ Հակոբյանը:
Նա տեղեկացրեց, որ մեծ պատվիրակություններ են ժամանել ՌԴ-ից, ԱՄՆ-ից, Եվրոպայից, Արևելքի երկրներից և, իհարկե, Արցախից: Այս տարի համաժողովին միացել են նաև սփյուռքահայեր Մալայզիայից, Ճապոնիայից, Սինգապուրից, Սուդանից:
Նախարարը շեշտեց, որ նշանավոր սփյուռքահայերի գործնական որոշումներով, իրատեսական հարցադրումներով կհարստացնեն Հայաստան-Սփյուռք գործակցությունը:
Այսպիսով, Հրանուշ Հակոբյանը Հայաստան-Սփյուռք համահայկական համաժողովը հայտարարեց բացված:
