ԵՐԵՎԱՆ, 14 սեպտեմբերի — Sputnik. Վրաստանի նախկին նախագահ Միխեիլ Սահակաշվիլին ուղևորվելու է Կիև` քաղաքը «փրկելու» նպատակով։ Այս մասին գրում է Gordonua.com-ը։
Օդեսայի նախկին նահանգապետը սեպտեմբեր ի 13-ին հայտարարել է, որ «հավաքում է Ուկրաինայի մարդկանց », որպեսզի սեպտեմբերի 19-ին գնա Կիև։
«Ես արդեն լավ փորձ ունեմ առաջին քաղաքի` Չեռնովցիի հետ։ Թեև ինձ ասում էին` վաղն ախր ամսի 13-ն է, պետք չէ գնալ… Ես ևս մի քանի քաղաք կմեկնեմ, այնուհետև կտեղափոխվենք Կիև։ 19-ը, որքան գիտեմ, Միքայել հրեշտակապետի օրն է։ Չգիտեմ… Կիևի պահապանի։ Կիևը պետք է շտապ փրկել»,- ասել է Վրաստանի նախկին նախագահը։
Սահակաշվիլու խոսքով` նա իր համախոհների հետ կուղևորվի Կիև, ու դա «սկիզբ կդառնա»։
«Այնուհետ մի քանի շաբաթ անց մենք ավելի շատ կլինի։ Իսկ հետո ամեն ինչ կլինի այնպես, ինչպես եղավ «Շեգինի» անցակետում` ճանապարհը կբացվի։ Բայց այս անգամ` օլիգարխների համար մյուս կողմից, իսկ Ուկրաինայի համար` դեպի առաջ»,- հայտարարել է նա։
Հիշեցնենք, որ Միխեիլ Սահակաշվիլիու կողմնակիցները սեպտեմբերի 10-ին «Շեգինի» անցակետում ճեղքել էին ուժայինների շղթան, որից հետո Սահակաշվիլին անցել էր Ուկրաինայի տարածք։
Նշենք, որ հուլիսի 26-ին Ուկրաինայի միգրացիոն ծառայությունը հայտնել էր, որ երկրի նախագահ Պյոտր Պորոշենկոն Սահակաշվիլուն քաղաքացիությունից զրկելու մասին հրամանագիր է ստորագրել: Նախօրեին Սահակաշվիլին հայտնել էր, որ մտադիր է Լեհաստանից դուրս գալ ու անցնել Լվովի մարզի «Կրակովեց» անցակետով։
2013 թվականի նոյեմբերին Սահակաշվիլին լքել է Վրաստանն այն բանից հետո, երբ նոր նախագահը ստանձնել է պաշտոնը։ Վրաստանի Գլխավոր դատախազությունը հեռակա կարգով մեղադրանք է ներկայացրել Սահակաշվիլուն չորս քրեական գործով։ Վրաստանը մի քանի անգամ դիմել է ուկրաինական կողմին՝ Սահակաշվիլուն ձերբակալելու ու արտաքսելու պահանջով։ Պաշտոնական Կիևն ուսումնասիրում է Օդեսայի նախկին նահանգապետի արտաքսման մասին գործը։
