ԵՐԵՎԱՆ, 10 սեպտեմբերի — Sputnik. Վրաստանի նախկին նախագահ, Օդեսայի նախկին նահանգապետ Միխեիլ Սահակաշվիլին, որը փորձում էր Լեհաստանից հասնել Ուկրաինա ու այդ նպատակով ավտոմեքենայից տեղափոխվել էր գնացք, ի վերջո ոտքով է տեղ հասել: Բաթումի նախկին քաղաքապետը, քաղաքագետ Գելա Վասաձեն մեկնաբանել է Սահակաշվիլու «հերոսական քայլը»:
«Եվ ի՞նչ եղավ արդյունքում, որ Սահակաշվիլին հասավ Ուկրաինա: Այսօվանից կարելի է հստակ ասել, որ նա ուկրաինական քաղաքական գործիչ է: Եվ ինչպես ինքներդ եք հասկանում՝ ոչ այն պատճառով, որ նա ամբողջ օրը խոսում էր ուկրաիներեն: Հետաքրքիր է՝ նա Պյոտր Պորոշենկոյին շնորհակալություն հայտնե՞լ է այդ հնարավորությունն ընձեռելու համար»,- ֆեյսբուքյան իր էջում գրել է Վասաձեն:
Նշենք, որ Սահակաշվիլին փորձում էր Լեհաստանից հասնել Ուկրաինայի տարածք։ Հնարավոր սադրանքներից խուսափելու համար որոշել էր ավտոմեքենայից տեղափոխվել գնացք։ Սակայն Լեհաստանից Ուկրաինա ընթացող գնացքում Սահակաշվիլիին բարձախոսի միջոցով խնդրել էին դուրս գալ։
Ինչպես հայտնում է ՌԻԱ Նովոստին, վագոնում հնչել էր հետևյալ հայտարարությունը․ «Մեր գնացքում գտնվում է Ուկրաինայի տարածք մուտք գործելու իրավունք չունեցող անձ։ Գնացքը չի շարժվի, քանի դեռ այդ անձը չի լքել փոխադրամիջոցը»։
Ի պատասխան՝ Սահակաշվիլին պնդել էր, որ գնացքը կանգնեցրել են Պորոշենկոյի հրամանով, իսկ ուղևորներին «պատանդ են վերցրել», որպեսզի իրեն չթողնեն մտնել երկիր։
«Պատկերացնո՞ւմ եք՝ ինչ վայրենիների հետ գործ ունենք։ Վայրի էր սովետական վատ ժամանակների մեթոդով ինձ քաղաքացիությունից զրկելը։ Բայց օտար տարածքում ամբողջ գնացքը կանգնեցնել՝ ԵՄ-ում, հարյուրավոր ուղևորներով, դուք երբևէ նման բան տեսե՞լ եք»։
Նշենք, որ հուլիսի 26-ին Ուկրաինայի միգրացիոն ծառայությունը հայտնել էր, որ երկրի նախագահ Պյոտր Պորոշենկոն Սահակաշվիլուն քաղաքացիությունից զրկելու մասին հրամանագիր է ստորագրել: Նախօրեին Սահակաշվիլին հայտնել էր, որ մտադիր է Լեհաստանից դուրս գալ ու անցնել Լվովի մարզի «Կրակովեց» անցակետով։
2013 թվականի նոյեմբերին Սահակաշվիլին լքել է Վրաստանն այն բանից հետո, երբ նոր նախագահը ստանձնել է պաշտոնը։ Վրաստանի Գլխավոր դատախազությունը հեռակա կարգով մեղադրանք է ներկայացրել Սահակաշվիլուն չորս քրեական գործով։ Վրաստանը մի քանի անգամ դիմել է ուկրաինական կողմին՝ Սահակաշվիլուն ձերբակալելու ու արտաքսելու պահանջով։ Պաշտոնական Կիևն ուսումնասիրում է Օդեսայի նախկին նահանգապետի արտաքսման մասին գործը։
