ԵՐԵՎԱՆ, 14 սեպտեմբերի — Sputnik, Անի Լիպարիտյան. Հայկական հյուրընկալությունն ու սիրալիրությունն անչափ տպավորել է պետերբուրգցի զույգին` Նիկիտա և Յուլյա Գոլոշապովներին։ Փոքրիկի սպասող ամուսինները համարում են, որ Հայաստանը ճամփորդության համար անվտանգ վայր է։ Երիտասարդ ամուսինները նշում են, որ ի տարբերություն Վրաստանի, այստեղ կարող են նաև հանգիստ շփվել իրենց մայրենի լեզվով։
«Մեզ դուր եկավ հայերի հյուրընկալությունը. անծանոթ մարդիկ մեզ իրենց տուն էին կանչում, օգնություն առաջարկում ու շատ էին ուրախանում, երբ մենք հայերեն էինք բարևում նրանց», — Sputnik Արմենիայի թղթակցի հետ զրույցում պատմեց Յուլյան։
Նիկիտան ու Յուլյան որոշել են Հայաստան գալ Վրաստան կատարած կարճատև ճամփորդությունից հետո։
Նրանք եղել են Սևանում, Խոր Վիրապում, հիացել Արարատով և, իհարկե, մեկնել են Տաթև ու վայելել աշխարհի ամենաերկար հետադարձելի ճոպանուղու հաճույքը։ Հիմնականում վրաններում են գիշերել, մի երկու օր էլ` հյուրանոցում։
«Բարեբախտաբար, հղիությունս լավ է ընթանում, բարդություններ չկան, ինձ անընդհատ ինչ-որ բան են հյուրասիրում, առաջարկում են նստել, այստեղ մարդիկ չափազանց բարեհամբույր են։ Հայաստան եկանք մի հայի խորհրդով, որի հետ պատահաբար էինք ծանոթացել», — պատմեց Յուլյան։
Զգույշ վարորդներն ու Հայաստանի գեղատեսիլ վայրերը
Պետերբուրգցի զբոսաշրջիկներին զարմացրել են նաև հայ վարորդները։
«Վրաստանից հետո թվում էր` հայերը շատ զգույշ են երթևեկում, իրարից առաջ չեն անցնում, շրջվելիս կրկնակի գիծը չեն հատում ու նույնիսկ թարթիչներն են միացնում», — խոստովանեց Յուլյան։
Հենց տաքսիստներից մեկի խորհրդով էլ նրանք որոշել են այցելել Տաթևի մոտ գտնվող «Սատանի կամրջի» հանքային աղբյուրներ։
«Երեկոյան անցնում էինք այդ հատվածքով, վարորդը պատմեց աղբյուրների մասին։ Մենք էլ որոշեցինք անպայման տեսնել։ Հանքային աղբյուրներն ու Տաթևի գեղեցիկ բնությունն իսկապես հնարավոր չի լինի մոռանալ», — պատմեց ռուս զբոսաշրջիկը։
Ծխախոտն է շատ
Յուլյային ու նրա ամուսնուն դուր չի եկել, որ Հայաստանում ամեն քայլափոխի ծխում են։
«Մեզ մոտ արգելվում է ծխել հանրային վայրերում։ Ես անընդհատ փորձում էի ինչ-որ տեղ գտնել, որտեղ ծուխ չլինի, որովհետև մարդիկ չեն կաշկանդվում շրջապատի երեխաներից ու հղի կանանցից», — նշեց Յուլյան։
Փոքր-ինչ դժվարություններ են ունեցել նաև մեկ այլ հարցում, ասում են` այն ճանապարհորդները, ովքեր սովոր են քարտով վճարել, Հայաստանում դժվարությունների կբախվեն, որովհետև Երևանից դուրս շատ տեղերում հարկավոր է կանխիկ գումարով վճարել։
Տհաճություն է պատճառել ճանապարհների մոտ կուտակված աղբը (նրանք նշում են, որ Ռուսաստանում էլ նույն խնդիրը կա) և այն, որ Սևանի ափին գտնվող հաստատություններից մի քանիսում համացանցին միանալու հնարավորություն չի եղել։
Sputnik Արմենիան շարունակում է հետևել այն զբոսաշրջիկներին, որոնք Հայաստանում հանգստանալուց հետո սոցիալական կայքերում հետաքրքիր լուսանկարներ են հրապարակում։
