ԵՐԵՎԱՆ, 14 սեպտեմբերի – Sputnik. Կիրակի երեկոյան արևի վրա տեղի է ունեցել նոր հզոր բռնկում, որի ակտիվության գագաթնակետը գրանցվել է Երևանի ժամանակով 20.06-ին։ Սա բռնկումների վերջին շարքում ամենաուժեղն էր, ընդ որում` ամենաուժեղը վերջին 12 տարվա ընթացքում: Արևի այսպիսի բռնկումները միանգամից մագնիսական փոթորիկներ են առաջացնում, որոնց Երկիր են հասցնում արեգակնային քամիները: Բյուրականի աստղադիտարանի տնօրեն Արեգ Միքայելյանը Sputnik Արմենիայի հետ զրույցում բացատրեց, թե ինչպես կարող է Արևի վրա տեղի ունեցողն ազդել մեզ վրա
Նրա խոսքով` եթե չլիներ մագնիսական դաշտը, Արևի այսպիսի բռնկումներն ուղղակի աղետալի հետևանքներ կունենային Երկրի ու մարդկության վրա:
«Մագնիսական փոթորիկները երկիր են հասնում մի քանի օրից, այսինքն` հենց այս պահին մենք դրանց ազդեցության տակ ենք»,- ասաց Միքայելյանը:
Ըստ նրա` Երկրի մագնիսական դաշտը դեֆորմացվելով` հարվածն իր վրա է վերցնում և թուլացնում դրանց ուժը: Ամենաշատն այս դեպքում փոթորիկների հետևանքները զգում են էլեկտրակայաններն ու հեռահաղորդակցման համակարգերը: Օրինակ` կապը կարող է խափանվել:
Մարդու վրա Արևի վրա կատարվողը կարող էր ավելի ծանր ազդել, եթե Արևն ավելի մոտ լիներ: Մարդն այդ ամենն ուղղակիորեն չի զգում: Թեև, ըստ աստղադիտարանի տնօրենի, դեռևս մինչև վերջ ուսումնասիրված չէ մարդու վրա Արեգակի ու մագնիսական փոթորիկների ազդեցությունը:
«Արեգակը հիմա պասիվ ակտիվության փուլում է, բայց որքան թույլ են բռնկումները, այնքան դրանք շատ են: Որքան քիչ են, այդքան՝ ուժեղ: Բռնկումն արեգակի ընդհանուր ճառագայթման մեջ մի փոքր մասն է: Ավելի հզորները կան, օրինակ` հրվիճակները, արևաբծերը»,- շարունակում է Միքայելյանը:
Դրանց գումարային ազդեցությունն, օրինակ, ըստ նրա, կարող է նաև առանձին դեպքերում ազդել Երկրի ջերմաստիճանի վրա: Այս պահին, սակայն, դժվար է ասել` աշնանային այս շոգերը կապ ունեն բռնկումների հետ, թե ոչ:
