ԵՐԵՎԱՆ, 12 սեպտեմբերի — Sputnik. Աղմուկը Թումանյանի տուն–թանգարանում ընդհատված ցուցահանդեսի շուրջ չի դադարում: Արդեն տեղի ունեցածը մեկնաբանել են մշակույթի նախարարն ու փոխնախարարը: Թանգարանի տնօրեն Նարինե Թուխիկյանը չի պատասխանում այդ մեկնաբանություններին, փոխարենը խոստանում է դիմել ոստիկանություն:
«Անկեղծ ասած՝ աղմուկ չէի ուզում, բայց, տեսնելով այս իրարանցումը, հասկացա, որ սխալ են անում և կդիմեմ ոստիկանություն»,- մեզ հետ զրույցում անելիքների մասին պատմեց Նարինե Թուխիկյանը:
Իսկ ոստիկանություն նա կդիմի իր ստացած սպառնալիքների համար: «Խավարում» անվամբ ցուցահանդեսը բացվել էր դեռևս օգոստոսի 4-ին, դրա մասին, ըստ Թուխիկյանի, իմացել են բոլորը,այդ թվում՝ մշակույթի նախարարությունը: Դա ցուցահանդես էր, որտեղ փաստական տվյալներով ներկայացված են եղել այն հայ բոլշևիկների ստորությունները, որոնք գլխատեցին Թումանյանի ընտանիքը: Նրա երեք որդիները հենց հայ բոլշևիկների թեթև ձեռքով զոհվեցին մեկ տարվա ընթացքում՝ իրար հետևից:
«Ցուցահանդեսի բացման 15-րդ օրը զանգեց Կոմկուսի առաջնորդը, սպառնալիքներ հնչեցրեց՝ լուրջ չընդունեցի: Հետո մեկ ուրիշը զանգեց՝ ինչ-որ փոխգնդապետ, էլի անձնական սպառնալիքներ հնչեցին, զրպարտանք: Դրանից հետո էր, որ մշակույթի նախարարությունը որոշեց փակել այն: Հենց սա եմ ես զրպարտանք համարում»,- ասում է Նարինե Թուխիկյանը։
Նա էլի է հաստատում. հենց այդ զրպարտանքի պատճառով է փակվել ցուցադրությունը:
Հիշեցնենք, որ մշակույթի նախարար Արմեն Ամիրյանը թեմայի շուրջ մեկնաբանություն է տվել Factor.am-ին: Այն ներկայացնում ենք ստորև.
«Հովհաննես Թումանյանի թանգարանում «Խավարում» թեմայով ժամանակավոր ցուցահանդեսի շուրջ որևէ խնդրահարույց դրվագ չի եղել։ Հայաստանի մշակույթի նախարարության բոլոր ՊՈԱԿ-ները պարտավոր են մեկամյա կտրվածքով իրենց ցուցադրությունները համաձայնեցնել նախարարության հետ։ Թումանյանի թանգարանին զգուշացվել է, որ նախարարության հետ համաձայնեցված չի եղել ցուցադրանքի բացօթյա ձևաչափը, և թանգարանը հավաքել է դրսում ցուցադրվող պաստառները»։
Թուխիկյանը չի կասկածում. ցուցահանդեսը փակվել է բովանդակության պատճառով: Ամբողջ նյութը փաստագրություն է՝ կոնկրետ հղումներով, պատճառներ, որ բերեցին Առաջին Հայրապետության կործանմանը ու հիմա Թուխիկյանի համար, առնվազն, զարմանալի, թե ինչու անկախ Հայաստանում դեմ են այդպիսի բովանդակության:
Ինչ վերաբերում է նախարարության տեղյակ լինել-չլինելուն, ապա անգամ գերատեսչության շրջաբերականն այդ մասին Նարինե Թուխիկյանը կարող է ցույց տալ:
«Ավելի մանրամասն ծանոթանալուց հետո նպատակահարմար համարվեց, որպեսզի որոշակի շտկումներ կատարվեն»,- լրատվամիջոցներին ասել էր նաև մշակույթի փոխնախարար Արև Սամուելյանը:
Սամուելյանի ձևակերպմամբ՝ «Ճիշտ է, թեման ակտուալ է, մենք պետք է պատմությանը պարզ երեսով նայենք, բայց կարծում եմ, որ այն մի փոքր քաղաքականացված էր»:
Թուխիկյանն էլի հակադարձում է. ցուցահանդեսի հեղինակը թանգարանն է, հենց նա էլ կորոշի՝ անի, թե չանի շտկումները: Իսկ ցուցահանդեսն, իսկապես, քաղաքական էր. ոչ ոք չի էլ խուսափել դրանից:
«Եկեք ցեղասպանությունից էլ չխոսենք, դա էլ քաղաքական թեմա է»,- առաջարկում է Թումանյանի տուն-թանգարանի տնօրենը՝ չմոռանալով հիշեցնել. ցուցադրությունն արդեն կա ինտերնետում ու դրա փակումն այնտեղ, դիտումների իմաստով, հակառակ էֆեկտն է ունեցել:
