Խաչիկ Չախոյան, Sputnik.
Բացառությամբ առաջին փուլի, մրցումների մյուս հատվածում Արոնյանից պահանջվեցին լրացուցիչ պարտիաներ` մրցակցի նկատմամբ առավելության հասնելու համար:
Մրցաշարի նախնական փուլում Արոնյանը ֆավորիտ է համարվում յուրաքանչյուր մրցակցի հետ պայքարում: Բայց ինչպես ցույց տվեց մրցաշարի ընթացքը, շախմատում էլ անկանխատեսելի արդյունքներ կարող են գրանցվել: Հենց այսպես պետք է բացատրել Մագնուս Կառլսենի, Հիկարուր Նակամարուայի, Վիշվանաթան Անանդի և Սերգեյ Կարյակինի պարտությունները նախնական փուլերում:
Պարզապես այստեղ մի փոքրիկ նրբություն կա: Մագնուս Կառլսենի ու Սերգեյ Կարյակինի համար մրցաշարը սպորտային տեսանկյունից այնքան էլ հետաքրքիր չէ: Նորվեգացինն` որպես աշխարհի չեմպիոն, իսկ Կարյակինը` որպես եզրափակիչի մասնակից, արդեն ունեն հավակնորդների մրցաշարի ուղեգիր: Հետևաբար, նրանց համար պարտությունն այնքան էլ ցավալի չէ: Իսկ ահա մյուսները պայքարում են երկու ուղեգրի համար, որոնք կստանան Թբիլիսիի մրցաշարում եզրափակիչ դուրս եկած երկու շախմատիստները:
Լևոն Արոնյանի համար, անկասկած, շատ կարևոր մրցաշար է, հետևաբար, հայ գրոսմայստերը ձգտելու է առնվազն հասնել եզրափակիչ: Պարզապես նշենք, որ 1/32 և 1/16 եզրափակիչներում մեր շախմատիստը լուրջ դիմադրության հանդիպեց նախ աշխարհի կանանց քառակի չեմպիոն չինուհի Հոու Յիֆանի կողմից, ապա դժվարին պայքարում կարողացավ հաղթանակի հասնել Մաքսիմ Մատլակովի նկատմամբ:
1/8 եզրափակիչում Արոնյանի մրցակիցը լինելու է Ռուսաստանը ներկայացնող Դանիիլ Դուբովը: Այստեղ էլ դժվար է կանխատեսել հակամարտության արդյունքը, բայց Արոնյանի հնարավորությունները, միևնույնն է, ավելի բարձր են գնահատվում: Դուբովին հաղթելու դեպքում Արոնյանը մրցելու է Վասիլի Իվանչուկ-Անիշ Գիրի զույգի հաղթողի հետ:
