ԵՐԵՎԱՆ, 12 սեպտեմբերի — Sputnik, Նելլի Դանիելյան. Երևանի Ավան, Նոր Նորք համայնքների ընդհանուր իրավասության դատարանում սեպտեմբերի 13-ին նախանշված «Սասնա ծռեր» խմբի 14 անդամների նկատմամբ դատական նիստի ճակատագիրն անհայտ է։ Այս մասին Sputnik Արմենիային ասաց խմբի անդամներից 2-ի` Էդվարդ Գրիգորյանի և Սեդրակ Նազարյանի շահերի պաշտպան, փաստաբան Լուսինե Սահակյանը։
«Եթե դատարանն օրենքով առաջնորդվի, փաստաբանների բացակայության դեպքում պետք է հետաձգի նիստը»,- ասաց Սահակյանը` միաժամանակ հիշեցնելով, որ դատավոր Արտուշ Գաբրիելյանը մի քանի անգամ բացակա փաստաբանների փոխարեն ամբաստանյալներին առաջարկել է հանրային պաշտպան ներգրավել, որոնցից վերջինները հրաժարվել են։
«Անկախ նրանից մենք գալիս ենք դատական նիստի, թե ոչ, մեր մուտքը դատարանի դահլիճ խոչընդոտելու հնարավորությունը միշտ կար։ Սա արդեն իսկ լուրջ խնդիր է, ուստի մենք պետք է այս գործադուլով նաև ամեն ինչ անենք, որպեսզի նման բաներ չկրկնվեն»,- ասաց փաստաբանը։
Փաստաբանների դժգոհության ու բողոքի ակցիայի հիմնական պատճառը դատարան մուտք գործելիս իրենց խուզարկության ենթարկելն է, ինչը, նրանց պնդմամբ, անօրինական վերաբերմունք է։
Վաղվա բողոքի ակցիային միանալու մասին այս պահին հայտարարել է արդեն 182 փաստաբան, որոնք վաղը ի նշան իրենց նկատմամբ անպատվաբեր վերաբերմունքի դատական նիստերին չեն ներկայանա։
Թե փաստաբանների բացակայության պատճառով քանի դատական նիստ վաղը չի կայանա, Լուսինե Սահակյանը դժվարացավ ասել` նշելով, որ ակցիայի նախաձեռնողները նման հաշվարկ չեն արել։
Փաստաբանների նկատմամբ նախ ՔԿՀ-ներում, ապա նաև դատարաններում խուզարկությունների խնդիրը ծագել է շուրջ 1 տարի առաջ, հիմնականում «Բանդայի», «Սասնա ծռերի», «Իգլայի» պայմանական անուններով հանրությանը հայտնի քրեական գործերի նախաքննության ու դատաքննության ընթացքում։
Երեք աղմկահարույց գործի մեղադրական եզրակացությունները գրեթե միաժամանակ են հասել դատական ատյաններ ու զուգահեռաբար քննվելով` շարունակում են մնալ հանրության ուշադրության կենտրոնում։
Առաջին աղմկահարույց բացահայտումը տեղի ունեցավ 2015-ին, երբ նոյեմբերի 25-ին Երևանի Նորք-Մարաշ համայնքի բնակելի տներից մեկում ձերբակալվեցին Վահան Շիրխանյանի և Արթուր Վարդանյանի կազմակերպած զինված խմբի` «բանդայի» անդամները։ Շուրջ 2 տարի տևած նախաքննությունից հետո` 2017 հունիսի 9-ին, Կենտրոն և Նորք-Մարաշ համայնքների ընդհանուր իրավասության դատարանում մեկնարկեց և մինչ օրս ընթանում է «Բանդայի» գործով դատավարությունը։
Մեղադրական եզրակացության համաձայն` Վահան Շիրխանյանը, Արթուր Վարդանյանը և մյուս 18 ամբաստանյալը մեղադրվում են զինված խումբ կազմակերպելու ու դրան անդամակցելու համար։ Դատավարության մեկնարկից մինչ օրս կայացել է դատական 11 նիստ, որոնց գրեթե կեսը ինչ-ինչ պատճառով հետաձգվել է։
«Բանդայի» գործի հետ գրեթե միաժամանակ, մեկ օր ավելի շուտ` 2017թ-ի հունիսի 8-ին, Էրեբունի և Նուբարաշեն համայնքների ընդհանուր իրավասության դատարանում մեկնարկեց մեկ այլ զինված խմբի` «Սասնա ծռերի» 14 անդամի նկատմամբ դատական գործընթացը։ Այս դատարանի դահլիճների փոքր լինելու և ներկաների մեծ թվի պատճառով դատական նիստերը որոշվեց անցկացնել Ավան Նոր Նորք համայնքների դատարանում, որն ապահովված է ոչ միայն ավելի մեծ, այլև ավելի ապահով դահլիճով։ Դատական նիստն այստեղ ընթանում է ապակե պատի հետևում, որով դատավարության մասնակիցներն առանձնացված են նիստին ներկա քաղաքացիներից ու լրագրողներից։
Դատավարության մեկնարկից ի վեր կայացել է 10 նիստ, հերթական նիստը, ինչպես արդեն նշեցինք, նախանշված է վաղը` սեպտեմբերի 13-ին։
Աղմկոտ հաջորդ դատավարությունը մեկնարկեց այս տարվա հուլիսի 31-ին, և մինչ օրս կայացել է 4 դատական նիստ։
Այս գործով հիմնական մեղադրյալը ԼՂ պաշտպանության նախկին նախարար, պաշտպանության բանակի նախկին հրամանատար, Արցախի հերոս Սամվել Բաբայանն է։ Նա մեղադրվում է մյուս 6 ամբաստանյալների հետ նախնական համաձայնությամբ «Իգլա» տեսակի զենք ձեռք բերելու ու պահելու մեջ։ Բաբայանն իրեն առաջադրված մեղադրանքը չի ընդունում։
Թե ինչ ընթացք կստանան այս դատական գործընթացներն ու փաստաբանների բողոքի ակցիան, պարզ կդառնա վաղը, փաստաբանների հրավիրած քննարկումից հետո։
Sputnik Արմենիայի զրուցակից Լուսինե Սահակյանը չբացառեց, որ մեկօրյա ակցիան կարող է նաև շարունակություն ունենալ։
