ԵՐԵՎԱՆ, 10 սեպտեմբերի — Sputnik. Միխեիլ Սահակաշվիլու կողմնակիցներին (մոտ 100 մարդ) զայրացրել է սադրիչների ներկայությունը։ Այս մասին հայտնում է ՌԻԱ Նովոստին։
Թեև Ուկրաինայի պետական սահմանային ծառայության մամուլի կենտրոնից հորդորել էին, որ կարգը պահպանվի, այդուհանդերձ Լեհաստանի սահմանին գտնվող անցակետում բախում է տեղի ունեցել։ Ոստիկանությունը շրջանի մեջ է առել Սահակաշվիլու կողմնակիցներին։
«Ես մեկնում եմ Ուկրաինա, սակայն անհամբերությամբ սպասում եմ Վրաստան վերադառնալուն։ Դա իմ կյանքի նպատակն է, ճիշտ այնպես, ինչպես Ուկրաինային օգնել»,- վրացական «Ռուսթավի 2» հեռուստաընկերությանն ասել է Սահակաշվիլին։
Հուլիսի 26-ին Ուկրաինայի միգրացիոն ծառայությունը հայտնել էր, որ երկրի նախագահ Պյոտր Պորոշենկոն Սահակաշվիլուն քաղաքացիությունից զրկելու մասին հրամանագիր է ստորագրել: Նախօրեին Սահակաշվիլին հայտնել էր, որ մտադիր է Լեհաստանից դուրս գալ ու անցնել Լվովի մարզի «Կրակովեց» անցակետով։
2013 թվականի նոյեմբերին Սահակաշվիլին լքել է Վրաստանն այն բանից հետո, երբ նոր նախագահը ստանձնել է պաշտոնը։ Վրաստանի Գլխավոր դատախազությունը հեռակա կարգով մեղադրանք է ներկայացրել Սահակաշվիլուն չորս քրեական գործով։ Վրաստանը մի քանի անգամ դիմել է ուկրաինական կողմին՝ Սահակաշվիլուն ձերբակալելու ու արտաքսելու պահանջով։ Պաշտոնական Կիևն ուսումնասիրում է Օդեսայի նախկին նահանգապետի արտաքսման մասին գործը։
Չնայած ուկրաինական կողմի «դիմակայությանը», Վրաստանի նախին նախագահ Սահակաշվիլին գնացքով մեկնել է Ուկրաինա։ Լեհաստանի կառավարությունն այս որոշումը կայացրել է այն բանից հետո, երբ միջամտել են եվրապատգամավորները։
Ավելի ուշ հայտնի դարձավ, որ գնացքի ուղևորներին տեղափոխել են ավտոբուսներ։
