ԵՐԵՎԱՆ, 10 սեպտեմբերի — Sputnik. Մոսկվայի «Արարատ» ֆուտբոլային ակումբի գլխավոր մարզիչ Ալեքսանդր Գրիգորյանը չի կարողանում հասկանալ՝ ինչ արեց թիմի հետ նախկին նախագահ Վալերի Հովհաննիսյանը։ Նա այդ մասին խոսել է «Մատչ ՏՎ»-ի հետ հարցազրույցի ժամանակ։
«Վալերան զանգում էր, իսկ ես չէի կարող նրա հետ չշփվել՝ մենք այդ մարդու հետ մինչև վերջերս ծրագրեր էինք մշակում։ Նկատելով՝ ինչ վիճակում է Հովհաննիսյանը, ես արգելափակեցի նրան ու ընդհանրապես դադարեցի շփումը։ Նրան ասելու բան չունեմ։ Շնորհակալ եմ, որ հրավիրել է ինձ, բայց ես իմ սկզբունքներն ունեմ», — ասել է Գրիգորյանը։
Նա համոզված է, որ ամեն ինչ ճիշտ է արել։
«Երբ հայտնի դարձավ, որ հովանավորը դադարեցնում է աջակցությունը, ես առաջին հերթին հավաքեցի բոլոր առաջատար ֆուտբոլիստներին` Պավլյուչենկոյին, Ռեբկոյին, Իզմայլովին, Պոպովին ու մյուսներին։ Նրանք ապշած էին։ Բայց ես հարցրի` ի՞նչ ն է մեզ խանգարում հանդես գալ առաջիկա խաղում։ Հետո կերևա», — ասել է Գրիգորյանը։
Գրիգորյանը մեծ հույսեր է կապում ակումբի նոր ղեկավար Իգոր Կորոտկովի հետ՝ համարելով նրան խելացի, կազմակերպված, կամային ու հասկացող մարդ։
Գրիգորյանն ամենևին չի կասկածում, որ «Արարատն» իր շարունակությունը կունենա։ Սակայն դեռ շատ բան կա անելու։
«Մի կողմից` «Արարատում» շատ աստղեր կան, մյուս կողմից՝ թիմը շատ միջակ ֆիզիկական պատրաստվածություն ունի։ Իսկ մարտավարական պատրաստություն ընդհանրապես չունի։ Կարծիք կար, որ վարպետ խաղացողներն իրենք կհասկանան՝ ինչպես խաղան։ Դա անհեթեթություն է», — կարծում է մարզիչը։
Նրա խոսքով՝ «Արարատի» բախտը բերել է հովանավորի` Lifenews-ի հիմնադիր Արամ Գաբրիելովի հարցում, որը ֆուտբոլից լավ է հասկանում։ Նա զարմանալիորեն լավ է զգում թիմի վիճակը, ուժեղ ու թույլ կողմերը, հասկանում է՝ ինչպես է պետք զարգացնել ակումբը։
«Արարատի» ճակատագիրը մտահոգում է ոչ միայն մարզչին, այլև նրա ընտանիքին։ Գրիգորյանի ավագ դուստրը, որը զբոսաշրջության ոլորտում մենեջեր է, մշտապես հետևում է ակումբի իրադարձություններին։ Կրտսերը՝ Սոֆյան, գիտի թիմի բոլոր արդյունքները։
Ալեքսանդր Գրիգորյանը մոսկովյան «Արարատ» ակումբի մարզիչ է նշանակվել 2017 թվականի օգոստոսի 16-ին։ Պայմանագիրը կնքվել է երեք տարով։
