ԵՐԵՎԱՆ, 8 սեպտեմբերի — Sputnik. Յուրաքանչյուր կնոջ երջանկությունը սկսում է սեփական անձը սիրելուց, Գեղեցկության համաշխարհային օրվան նվիրված Երևան — Բիշքեկ — Մինսկ տեսակապի ժամանակ ասաց «Եվրոպա 2016»-ի առաջին վիցե-միսսիս, «Միսսիս Եվրոպա 2017»-ի մրցույթի ժյուրիի անդամ և մրցույթի` Հայաստանի ազգային տնօրեն Աննա Դեմիրխանյանը։
Նրա խոսքով` ի տարբերություն չամուսնացած կանանց, ամուսնացածները Հայաստանում ավելի շատ հոգսեր ունեն, նրանց ամբողջովին կլանում են կենցաղային խնդիրները։
«Ես ուզում եմ օգնել այդ կանանց… Պետք է այնպես անել, որ նրանք սիրեն իրենց, խնամեն, կանանց ակումբներում թրեյնինգների մասնակցեն։ Ընտանիքն ու երեխաները հրաշալի են, առաջնահերթ, բայց կինը երջանիկ է, երբ նա ինքնաբավ է ու սիրված։ Իսկ նա կարող է սիրված լինել, միայն եթե ինքն իրեն է սիրում», — ասաց Դեմիրխանյանը։
Նրա խոսքով` գեղեցկությունն անհնար է գնահատել, այն միշտ յուրահատուկ է։
«Ինձ համար բոլոր կանայք էլ գեղեցիկ են, տգեղ կանայք չկան, ամեն մեկը յուրովի գեղեցիկ է», — ասաց հայ գեղեցկուհին։
Դեմիրխանյանը խոստովանեց, որ «Միսսիս Եվրոպա — 2016» մրցույթը նրան շատ բան է տվել։ Առաջին հերթին` այլ երկրների կանանց հետ ծանոթանալու, նրանց կյանքի մասին իմանալու հնարավորություն։ Մրցույթին մասնակցելն անգնահատելի փորձ է եղել նրա համար։
«Հայաստանում աղջիկները հաճախ ստիպված են լինում ապացուցել, որ մոդելը նույնպես կարող է խելացի ու կրթված լինել, այլ ոլորտում աշխատել, լավ կին ու մայր լինել», — ասաց նա։
Ինչ վերաբերում է գեղեցկության մրցույթներին, ապա Հայաստանում իրավիճակն ուրախալի չէ. վերջին 10 տարվա ընթացքում այդօրինակ մրցույթներ չեն անցկացվում։
Աննան ուրախ է, որ այս տարի վերջապես կանցկացվի «Միսս Հայաստան» մրցույթը և հույս ունի, որ այն շարունակական կլինի և բացի դրանից նաև «Միսսիս Հայաստան» մրցույթ կանցկացվի։
