ԵՐԵՎԱՆ, 8 սեպտեմբերի — Sputnik. ԱՄՆ-ի մեղադրանքը ոչ այլ ինչ է, քան Թուրքիայի դեմ ուղղված քայլ։ Այսօր լրագրողների հետ հանդիպման ժամանակ հայտարարել է Թուրքիայի նախագահ Ռեջեփ Թայիփ Էրդողանը։ Այս մասին հայտնում է ՌԻԱ Նովոստի գործակալությունը։
ԱՄՆ-ի իշխանությունները Թուրքիայի էկոնոմիկայի նախկին նախարար Մեհմեդ Զաֆեր Չաղլայանին, Թուրքիայի պետական բանկի գլխավոր կառավարիչ Սուլեյման Ասլանին ու ևս երկու թուրք պաշտոնյայի մեղադրել են Իրանի դեմ պատժամիջոցների խախտման մեջ։ ԱՄՆ-ի կարծիքով` նրանք օգտագործել են ԱՄՆ-ի ֆինանսական համակարգը և Իրանի կառավարության շահերից բխող բազմամիլիոնանոց գործարքներ են իրականացրել։
«Տարօրինակ պատմություն է, որն իրավական տեսակետից մեկնաբանելը նույնպես տարօրինակ է։ Մեր նախկին նախարարի հասցեին ուղղված մեղադրանքները ես գնահատում եմ որպես Թուրքիայի դեմ ուղղված քայլ։ Նրան մեղադրում են Իրանի պատճառով։ Սակայն Իրանը մեզ համար երբեք չի եղել այն երկիրը, որի դեմ մենք պատժամիջոց ենք կիրառել։ Մենք առևտրական սերտ հարաբերություններ ունենք, նրանից էներգակիրներ ենք գնում։ ԱՄՆ-ի այս քայլը բացառապես քաղաքական բնույթ է կրում, և նրանք պետք է վերանայեն այդ հայտարարությունը։ Այդպիսի գործողություններից վատ հոտ է գալիս», — ասել է Էրդողանը։
Նա մեղադրել է առաջատար եվրոպական քաղաքական գործիչներին Անկարայի դեմ քայլեր անելու մեջ` ընդգծելով, որ նրանց պարզապես ձեռնտու չէ Թուրքիայի ուժեղացումը։ Ավելի վաղ ԳԴՀ կանցլեր Անգելա Մերքելը հայտարարել է, որ Թուրքիայի ու Եվրամիության միջև նոր մաքսային համաձայնագրի մասին բանակցություններն անթույլատրելի են։
ԵՄ-ի ու Թուրքիայի հարաբերությունները սրվել են երկրում զինված հեղաշրջման փորձից հետո։ Այն ժամանակ ԵՄ-ն հանդես եկավ Թուրքիայի իշխանությունների հասցեին խիստ քննադատությամբ` զանգվածային ձերբակալությունների և այլ խիստ միջոցների համար ու կասեցրեց Թուրքիայի` Եվրամիություն մտնելու շուրջ բանակցությունները։
