ԵՐԵՎԱՆ, 6 սեպտեմբերի — Sputnik, Լաուրա Սարգսյան. Իրաքյան Քրդստանի անկախության հռչակումը դրական ազդեցություն կունենա հարավկովկասյան հակամարտության խաղաղ կարգավորման վրա, կարծում են փորձագետները։ Ղարաբաղյան հակամարտության պարագայում դա տեղի կունենա Թուրքիայի դիրքի թուլացման հաշվին, որն Ադրբեջանին ակտիվորեն հրահրում է ռազմական գործողություններ սկսել Ղարաբաղում։
«Քրդստանի անկախության հռչակումը կարող է քրդական շարժումների արթնացման հիմք դառնալ, ինչը կթուլացնի Թուրքիայի դիրքերը։ Դա կարող է տարածաշրջանում դրական ֆոն ստեղծել Հայաստանի համար», — Sputnik Արմենիայի թղթակցի հետ զրույցում ասաց թուրք-քրդական հարաբերությունների գծով փորձագետ Կարեն Հովհաննիսյանը։
Նա կարծում է, որ Քրդստանում հայերենը պետական լեզու է հայտարարվելու, ինչպես արաբերենը, քրդերենը, ասորերենն ու թուրքմեներենը։ Սիրիական հակամարտության ժամանակ մի շարք հայեր ապաստան գտան Իրաքյան Քրդստանի տարածքում։ Թե որքան հայ է այսօր բնակվում այդ տարածաշրջանում, դեռ հայտնի չէ։
Թուրքիայում ամեն ինչ չէ, որ հարթ է, այդ մասին մի շարք գործոններ են վկայում, այդ թվում քրդական շարժման ակտիվացումը կանխելու Թուրքիայի անհաջող փորձը։ Անկարան նույնիսկ մեծ ցանկության դեպքում չի կարող ազդել նաև Քրդստանի ինքնորոշման հանրաքվեի վրա, որը նախատեսվում է անցկացնել սեպտեմբերի 25-ին և որին ավելի քան 6 մլն քուրդ է պատրաստվում։
«Թուրքիան այդ հարցի վերաբերյալ երկակի դիրքորոշում ունի։ Անկարան սերտ տնտեսական հարաբերություններ ունի Քրդստանի հետ` նավթ է արդյունահանում։ Թուրքիան չի տապալի հանրաքվեն, նա առանց այդ էլ մի շարք խնդիրներ ունի», — Sputnik Արմենիայի թղթակցի հետ զրույցում ասաց Ռուսաստանի գիտությունների ակադեմիայի Արևելագիտության ինստիտուտի ավագ գիտաշխատող Կոնստանտին Տրուևցևը։
Փորձագետներն անիրատեսական են համարում նաև Քրդստանի անջատումը Իրաքից։ Իրաքյան քրդերը պետք է քաղաքական և տնտեսական բնույթի մի շարք հարցեր լուծեն։
