ԵՐԵՎԱՆ, 7 սեպտեմբերի — Sputnik, Արմենուհի Մխոյան. Այսօր ժամը 11:27-ին տեղեկություն է ստացվել, որ հրդեհ է բռնկվել Ջաջուռ գյուղի մոտակա սարալանջին: Դեպքի վայր է մեկնել երեք մարտական հաշվարկ եւ ՃԿԿ օպերատիվ խումբը: Սակայն, տեղանքի հետ կապված, տեխնիկա օգտագործել չի հաջողվել, և ոտքի են հանվել հարակից համայնքների բնակիչները: Հրդեհաշիջման աշխատանքներին մասնակցել են Ջաջուռ, Կամո, Ջաջուռավան եւ Կրաշեն գյուղերի բնակիչները՝ գյուղապետերի գլխավորությամբ։ Այդ մասին Sputnik Արմենիային տեղեկացրեց ԱԻ նախարարության Շիրակի մարզային փրկարարական վարչության պետ Արթուր Կարապետյանը:
Հաշվի առնելով հրդեհի բարդությունն ու անհրաժեշտությունը՝ աշխատանքներում ներգրավվել են նաև ոստիկաններ և զինվորականներ՝ ոստիկանության Ախուրյանի բաժնի աշխատակիցներն ու Գյումրու կայազորի զինծառայողները, «Հայ անտառտնտեսության» ՊՈԱԿ-ի և Շիրակի մարզային փրկարարական վարչության աշխատակիցները, նույնիսկ նրանք, ովքեր գտնվել են արձակուրդի մեջ:
«Կանչն անմիջապես փոխանցվել է Ախուրյանի հրշեջ փրկարարական ջոկատին, որտեղից դուրս է եկել 2 մարտական հաշվարկ և ևս 1 մարտական հաշվարկ Գյումրիից, սակայն այդ մարտական հաշվարկները հնարավոր չեն եղել ներգրավվել հրդեհաշիջման աշխատանքների մեջ ռելիեֆի պատճառով այրվում էին սարի գագաթները և այնտեղ հասնելն անհնար էր, անմիջապես աշխատանքների մեջ ներգրավել ենք համայնքների բնակիչներին ու տարբեր գերատեսչությունների մարդկանց՝ 180 հոգու: Մարդկային ուժի աշխատանքի շնորհիվ կրակը մարվել է»,- նշեց փրկարար ծառայության գնդապետը՝ հավելելով, որ հիմնական դժվարությունը, բացի ռելիեֆից, նաև ուժեղ քամու պատճառով էր. քամին շատ արագ տարածել է կրակը:
Այրվել է բուսածածկույթ (մոտ 50 հա): Աշխատանքները ղեկավարել են Արթուր Կարապետյանը և Շիրակի փոխմարզպետ Սերյան Պետրոսյանը: Փրկարարներից մեկը այրվածքներով տեղափոխվել է Գյումրու բժշկական կենտրոն:
«Այս պահին ամեն ինչ նորմալ ու վերահսկելի է»,- հաստատեց Արթուր Կարապետյանը՝ շնորհակալություն հայտնելով հրդեհաշիջման աշխատանքներին մասնակցած մարդկանց:
Բժշկական կենտրոն տեղափոխած փրկարարի վիճակն այս պահին գնահատվում է բավարար, նա գտնվում է բժիշկների հոգածության ներքո:
