ԵՐԵՎԱՆ, 7 սեպտեմբերի — Sputnik. «Հայաստան՝ փոքր, հոյակապ երկիր», Հայաստան կատարած եռօրյա այցից հետո Ֆեյսբուք սոցիալական ցանցում հրապարակած գրառումն այսպես է սկսել Դանիայի մշակույթի և եկեղեցական հարցերի նախարար Մեթե Բոկը:
«Եթե դժվարանում եք հասկանալ մշակույթի, լեզվի և պատմության նշանակությունը երկրի և բնակիչների համար, այցելեք Հայաստան կամ այդ մասին խոսեք Դանիայում բնակվող հայերի հետ»,- գրել է Բոկը:
Նա նշել է, որ Հայաստանն աշխարհի առաջին քրիստոնյա երկիրն է՝ սեղմված Վրաստանի, Ադրբեջանի, Պարսկաստանի և Թուրքիայի միջև:
«Հայերի պատմությունն ամուր ինքնություն ունեցող ազգի պատմություն է։ Երկիրը շատ աղետներ է տեսել։ Պատերազմներ, բռնագրավվումներ, թուրքերի կողմից աքսորներ և հարյուր հազարավոր հայերի սպանություններ 1915-17թթ-ին և այլն։ Բայց միևնույնն է երկիրը շարունակում է գոյություն ունենալ։ Իր լեզվով, գրերով և ամուր հավատքով, աշխարհի այն տարածաշրջանում որտեղ գերակշռող մասը մահմեդականներ են»,- գրել է նախարարը։
Բոկը նշել է, որ այսօր Հայաստանից դուրս ավելի շատ հայ է ապրում քան Հայաստանում:
«Բայց հայերը շարունակում են մնալ միասնական։ Ամուր ազգ՝ լի հույսով և հավատով դեպի ապագան»,- եզրափակել է դանիացի նախարարը:
Նշենք, որ Մեթե Բոկը հայաստանյան այցի շրջանակում եղել էր նաև «Զվարթնոց» պատմամշակութային արգելոց-թանգարանում և հիացել 7-րդ դարի ճարտարապետական կառույցի շքեղությամբ:
