ԵՐԵՎԱՆ, 6 սեպտեմբերի — Sputnik. ՀՀ փոխարտգործնախարար Շավարշ Քոչարյանի համար անհասկանալի է այն իրարանցումը, որ ստեղծվել է ՆԱՏՕ-ի զորավարժություններին չմասնակցելու Հայաստանի որոշումից հետո։ Այս մասին նա խոսել է լրագրողների հետ։
«Տեսեք` հարևան պետությունում տեղի են ունեցել ՆԱՏՕ-ի զորավարժություններ, որին մասնակցել է ընդամենը 5-6 պետություն: Ինչո՞ւ Հայաստանը մասնակցել է, չի մասնակցել… Ես չեմ հասկանում այս իրարանցումը»,- ասաց Քոչարյանը:
Լրագրողները հարց ուղղեցին` Մոսկվա՞ն է խանգարել Հայաստանի մասնակցությանը։ Ի պատասխան` Քոչարյանն ասաց, որ ինքը «բամբասանքներին չի պատասխանում»:
«Նախկինում եղել են ավելի լայնածավալ զորավարժություններ, որոնց Հայաստանը մասնակցել է։ Այս զորավարժությունների նպատակները փոխվել են: Պարտադիր չէ, որ Հայաստանը բոլոր միջոցառումներին մասնակցի»,- ասաց նա:
Քոչարյանն ընդգծեց`ի տարբերություն ՀԱՊԿ-ի մնացած անդամների, մենք ակտիվորեն համագործակցում ենք ՆԱՏՕ-ի հետ։
