Հայաստանը պաշտոնապես չի էլ հաստատել, որ մասնակցելու է Ախալցխայում Վրաստանի և ԱՄՆ-ի կազմակերպած զորավարժություններին, ուստի չմասնակցության մասին խոսք լինել չի կարող, Sputnik Արմենիային ասաց ԱԺ փոխնախագահ Էդուարդ Շարմազանովը։
«Հայտարարել, որ Հայաստանը հետ է կանգնել իր որոշումից, առնվազն կոռեկտ չէ», —ասաց Շարմազանովը:
Նրա խոսքով` Հայաստանն իրականացնում է ինքնիշխան որոշում: Իհարկե, Հայաստանը շատ դրական է ընդունում ՆԱՏՕ-ի հետ համագործակցությունը տարբեր ուղղություններով, միաժամանակ այս միջոցառմանը չմասնակցելով որևէ արտառոց բան տեղի չի ունենում:
Շարմազանովն ընդգծեց` Հայաստանը ՀԱՊԿ-ի լիարժեք անդամ է և երբևէ իր առջև խնդիր չի ունեցել ու նույնիսկ առաջիկա խորհրդարանական կառավարմանն անցնելիս էլ չի ունենա հրաժարվել ՀԱՊԿ —ից և անդամակցել ՆԱՏՕ-ին:
Ինչ վերաբերում է հարցադրումների, թե ինչ փոխվեց մեկ ամսվա ընթացքում, քանի որ Հայաստանը մասնակցեց նախորդ զորավարժություններին, Շարմազանովի խոսքով, դրանք նախ հումանիտար, ռազմաբժշկական զորախմբերի զորավարժություններ էին և որևէ երրորդ երկրի ուղղված չէին, և այդ զորավարժություններին չէին մասնակցում Ադրբեջանը և Թուրքիան:
Հայաստանի այդ զորավարժություններից հրաժարվելու մասին լուրերը կամ չակերտավոր քաղաքագետների ու փորձագետների վերլուծությունները, Շարմազանովի գնահատմամբ, նման են փոթորկի մի բաժակ ջրում:
«Մենք ՀԱՊԿ-ի լիիրավ անդամ ենք, և մեր անվտանգության գլխավոր գործընկերը ՀԱՊԿ-ն է: Մեր ռազմաքաղաքական դիվանագիտությունն ամբողջովին համապատասխանում է Հայաստանի արտաքին քաղաքականությանը և իր գործողությունների մեջ լիարժեք ու վստահ որոշումներ է կայացնում:
«Գաղտնիք չէ, որ ՀՀ Զինված ուժերը և ընդհանուր անվտանգային համակարգը ՀԱՊԿ համակարգում ունի շատ կարևոր դերակատարություն և ՀԱՊԿ-ի դերակատարությունը ՀՀ անվտանգային համակարգի համար կարևոր և առանցքային նշանակություն ունի»,- ասաց Շարմազանովը։
Ավելի վաղ Վրաստանի ՊՆ-ն հայտարարել էր, որ հայ զինծառայողները չեն ժամանել մասնակցելու Agile Spirit 2017 բազմազգ զորավարժություններին, որոնք նախօրեին մեկնարկել են «Օրպոլո» զորավարժարանում։
Agile Spirit-ին, բացի ՆԱՏՕ-ի անդամ երկրներից, մասնակցում են նաև Վրաստանի և ՆԱՏՕ գործընկեր երկրները՝ Ուկրաինան և Ադրբեջանը:
Զորավարժությունները երկու փուլ են նախատեսում` շտաբային և դաշտային: Agile Spirit զորավարժություններն անցկացվում են Վրաստանում սկսած 2011 թվականից ամեն տարի` Վրաստան-ՆԱՏՕ համագործակցության շրջանակներում: Նպատակն է` կատարելագործել փոխգործակցությունը կանոնավոր գործողություններում և ծանոթանալ տարբեր երկրների ռազմական մարտավարություններին: 2015 թվականին այդ զորավարժություններին հայկական կողմը մասնակցել է դիտորդի կարգավիճակով:
