ԵՐԵՎԱՆ, 6 սեպտեմբերի — Sputnik, Անի Լիպարիտյան. Հայկական դուդուկն ու ռուսական ժողգործիքները կհնչեն սեպտեմբերի 7-ին Արամ Խաչատրյանի անվան համերգասրահի բեմում։ Երևանի հանդիսատեսի համար ելույթ կունենան «Ռուսկիե ստրունի» (The Russian String Enssemble) ռուսական համույթն ու Ջիվան Գասպարյան կրտսերը։
Բացի հայկական և ռուսական ժողովրդական երաժշտությունից, բեմից կհնչեն նաև ջազային կատարումներ։
«Ռուսկիե ստրունի» համույթի ղեկավար Պավել Օգորոդնիկովը Sputnik Արմենիային պատմել է այն մասին, թե ինչպես է ծնվել համատեղ համերգ անցկացնելու գաղափարը։
«Գաղափարը ծնվեց մի քանի տարի առաջ Մոսկվայում Օսիպովի անվան նվագախմբի համերգի ժամանակ։ Այն ժամանակ նույն բեմում նվագախմբի հետ հանդես եկան ավագ և կրտսեր Ջիվան Գասպարյանները։ Այդ համերգի ժամանակ ես համոզվեցի, թե հայկական և ռուսական ժողգործիքները որքան նման են իրենց տեմբրով։ Բալալայկայի, բայանի և դուդուկի համադրությունը պարզապես հրաշալի էր», — ասաց Օգորոդնիկովը։
Նրա կարծիքով` ժողգործիքները յուրահատուկ հնչեղություն ունեն, իսկ ժողովրդական երաժշտությունն առանձնակի ոգի ունի։
«Ունկնդիրներից շատերը, ընդ որում` ոչ միայն հայերը, խոստովանում են, որ դուդուկի հնչյունները գերում են, կարծես ուրիշ աշխարհում լինես։ Ջիվանի հետ մեր համագործակցությունը սկսվեց Մոսկվայի համերգից և շարունակվում է մինչև այսօր», — ասաց Sputnik Արմենիայի զրուցակիցը։
Նրա խոսքով` համույթը ձայնագրել է կոմպոզիտոր Միխայիլ Չերնովի «Արարատ-Վոլգա» ստեղծագործությունը, որում հեղինակը մեկտեղել է հայկական և ռուսական մեղեդիները։
Ջիվան Գասպարյան կրտսերն էլ նշեց, որ տարբեր երկրների ու ժողովուրդների երաժշտությունը կարելի է համատեղել, բայց դա պետք է գրագետ անել։ Կարևորը իմպրովիզներ անելու ունակությունն է։
Երաժիշտը համոզված է` բոլոր նրանք, ովքեր կգան համերգին, հիասթափված չեն մնա։
«Ես ավելի քան համոզված եմ, որ հանդիսատեսը իսկապես հաճույք կստանա վաղվա համերգից։ Մենք կկատարենք ջազ, բլյուզ, դասական ստեղծագործություններ… Պետք է ասեմ` համույթի հետ համագործակցելը հեշտ է և հաճելի», — նշեց դուդուկահարը։
«Ռուսկիե ստրունի» համույթի գեղարվեստական ղեկավար Միխայիլ Չերնովը (բայան) նշեց, որ Ջիվանի հետ յուրաքանչյուր հանդիպումը համույթի երգացանկում նոր ստեղծագործություն է ավելացնում։
«Համերգների ընթացքում մենք անդադար թարմացնում ենք երգացանկը, նոր ստեղծագործություններ ենք կատարում», — ասաց նա։
Չերնովի խոսքով` երևանյան հանդիսատեսը կունկնդրի կրտսեր Ջիվան Գասպարյանի հետ համատեղ իրականացրած նախագծերի լավագույն ստեղծագործությունները։
