ԵՐԵՎԱՆ, 6 սեպտեմբերի — Sputnik. Աշխարհի բազմակի ռեկորդակիր Իգոր Տեր-Հովհաննիսյանի նման մարզիկները ուղենիշ են երիտասարդ մարզիկների համար, որոնք ոգևորվելով մարզական ձեռքբերումներով՝ կարողանում են հասնել ավելի բարձր նվաճումների, դիմավորելով հյուրին` մարզիկի հետ հանդիպմանն ասել է ՀՀ սպորտի և երիտասարդության հարցերի նախարարի տեղակալ Գաբրիել Ղազարյանը։
«Իգոր Տեր-Հովհաննիսյանի սահմանած հեռացատկի Եվրոպայի ռեկորդը մոտ 30 տարի հետո, Եվրոպայի նոր ռեկորդով, կարողացել է գերազանցել մեր հայրենակից Ռոբերտ Էմմիյանը: Այդ օրվանից նույնպես անցել է 30 տարի և հպարտությամբ կարելի է արձանագրել, որ հեռացատկի Եվրոպայի ռեկորդը 60 տարի շարունակ գտնվում է հայ մարզիկների «տիրապետության տակ»»,- ասել է նախարարի տեղակալը:
Հյուրը, շնորհակալություն է հայտնել ջերմ ընդունելության համար՝ նշելով, որ մասնակցել է Գյումրիում կայացած «Ռոբերտ Էմմիյանի գավաթի» խաղարկությանը և ուրախությամբ փաստում է, որ Հայաստանի Հանրապետությունում կան բազմաթիվ լավ աթլետներ։
«Հայկական աթլետիկայի վաղվա օրը ես բավականին խոստումնալից եմ տեսնում: Կարծում եմ` դա Հայաստանի աթլետիկայի ֆեդերացիայի և ՀՀ սպորտի և երիտասարդության հարցերի նախարարության հաջող համագործակցության արդյունքն է»,- ասել է լեգենդար մարզիկը:
Հանդիպման ավարտին Ղազարյանը Տեր-Հովհաննիսյանին հանձնել է խորհրդանշական հուշանվեր:
