ԵՐԵՎԱՆ, 5 օգոստոսի — Sputnik. Ազատ ոճի ըմբշամարտի Հայաստանի պատանիների հավաքականն օգոստոսի 23-ից ուսումնամարզական հավաք է անցկացնում Օլիմպավանում՝ պատրաստվելով աշխարհի առաջնությանը: Այս գիշեր թիմը կմեկնի մրցավայր՝ Աթենք: Հավաքականի ավագ մարզիչ Արշակ Հայրապետյանը ՀԱՕԿ լրատվականին հայտնել է, որ տասը քաշային կարգերից Հայաստանն ըմբիշ չի ունենա միայն 42 կգ քաշում։
«Թիմում ընդգրկել եմ Եվրոպայի առաջնության մրցանակակիրներին եւ գրեթե բոլոր մյուս քաշային կարգերում՝ երկրորդ համարներին: Այդ քաշերի առաջին համարներն աշխարհամասի առաջնությունում չէին արդարացրել իրենց, մենք էլ որոշեցինք մյուսներին հնարավորություն տալ»,- ասել է Հայրապետյանը:
Նրա խոսքով` տղաները լավ մարզավիճակում են: Իրավիճակն այնպիսին է, որ բոլորն էլ կարող են պայքարել մեդալի համար։
Աշխարհի առաջնությունում հանդես կգան Առաքել Մովսիսյանը (46 կգ), Գենիկ Առաքելյանը (50 կգ), Տիգրան Ղազարյանը (54 կգ), Սերոբ Սերոբյանը (63 կգ), Գրեգորի Ներսեսյանը (63 կգ), Դավիթ Գեւորգյանը (69 կգ), Ռազմիկ Սիմոնյանը (76 կգ), Կամո Հակոբջանյանը (85 կգ) և Մարտին Սիմոնյանը (100 կգ):
