ԵՐԵՎԱՆ, 5 սեպտեմբերի — Sputnik. Ալեքսանդր Սպենդիարյանի անվան օպերայի և բալետի ազգային ակադեմիական թատրոնի նոր թատերաշրջանը, ըստ ավանդույթի, կբացի «Անուշ» օպերան։ Հետաքրքիր պրեմիերաներ են ակնկալվում։ Այդ մասին այսօր հայտնեց Սպենդիարյանի անվան օպերայի և բալետի ազգային ակադեմիական թատրոնի տնօրեն Կոնստանտին Օրբելյանը։
Սեպտեմբերին երկու պրեմիերա է լինելու՝ Հարո Ստեփանյանի «Սասունցի Դավիթ» օպերան (սեպտեմբերի 9-ին) ու Գաետանո Դոնիցետիի «Պողիկտոս» օպերան (սեպտեմբերի 30)։
Նրա խոսքով՝ թատերաշրջանի սկզբում հանդես կգան Հայաստանի լավագույն օրերային երգիչները՝ Նունե Բադալյանը, Գևորգ Հակոբյանը, Պերճ Ղազարյանը։
«Թատերաշրջանի ընթացքում հետաքրքիր պրեմիերաներ կլինեն։ Սեպտեմբերի 14-ին Վերդիի «Ռեքվիեմի» պրեմիերան կլինի, որի համար մենք աշխատել ենք իտալացի բեմադրող Պաոլո Միչիկեի հետ։ Հանդիսատեսին սպասում է նաև «Մանոն» ու «Պողիկտոս» օպերաների պրեմիերան»,- հավելեց Օրբելյանը։
Սեպտեմբերի 1-ին Շուշիում կայացել է Արո Ստեփանյանի «Սասունցի Դավիթ» հերոսական օպերայի պրեմիերան։ Նախագծի հեղինակը բեմադրող Սարինե Ավթանդիլյանն է։
«Շուշիում պրեմիերան հիացմունքով դիմավորեցին։ Ներկա էին ոչ միայն Շուշիի բնակիչները, այլ նաև զբոսաշրջիկներ տարբեր երկրներից»,- ասաց Ավթանդիլյանը՝ հավելելով, որ շուտով օպերայի պրեմիերան կտեսնեն նաև երևանցիները։
85-րդ թատերաշրջանի շրջանակում նախատեսվում են բազմաթիվ համերգներ ու փառատոններ։
