ԵՐԵՎԱՆ, 3 սեպտեմբերի — Sputnik. Հայ զինծառայողները չեն ժամանել մասնակցելու Agile Spirit 2017 բազմազգ զորավարժություններին, որոնք այսօր մեկնարկել են Օրպոլո զորավարժարանում: Այս մասին Sputnik Արմենիային ասաց ՀՀ ՊՆ մամուլի խոսնակ Արծրուն Հովհաննիսյանը:
Իսկ ահա Վրաստանի ՊՆ հասարակայնության հետ կապերի և ռազմավարական հաղորդակցման բաժնի ղեկավար Նինո Տոլորդավան Sputnik Արմենիայի թղթակցի հետ զրույցում ասաց.
«Հայ զինծառայողները չեն ժամանել Agile Spirit 2017 միջազգային զորավարժությունների պաշտոնական բացմանը: Հայաստանի ՊՆ-ի ղեկավարությունից որևէ պարզաբանում դեռ չենք ստացել», — ասել է Տոլորդավան:
Հայ զինծառայողների` զորավարժություններին չներկայանալը մի փոքր զարմացրել է Վրաստանի պաշտպանական գերատեսչության ներկայացուցիչներին: ՀՀ ՊՆ-ում որևէ մեկնաբանություն դեռ չեն տալիս: Տոլորդավայի խոսքով` Agile Spirit-ին բացի ՆԱՏՕ-ի անդամ երկրներից մասնակցում են նաև Վրաստանի և ՆԱՏՕ գործընկեր երկրները՝ Ուկրաինան և Ադրբեջանը:
Զորավարժությունները երկու փուլ են նախատեսում` շտաբային և դաշտային: Agile Spirit զորավարժություններն անցկացվում են Վրաստանում սկսած 2011 թվականից ամեն տարի` Վրաստան-ՆԱՏՕ համագործակցության շրջանակներում: Նպատակն է` կատարելագործել փոխգործակցությունը կանոնավոր գործողություններում և ծանոթանալ տարբեր երկրների ռազմական մարտավարություններին: 2015 թվականին այդ զորավարժություններին հայկական կողմը մասնակցել է դիտորդի կարգավիճակով:
