ԵՐԵՎԱՆ, 3 սեպտեմբերի — Sputnik. Հայաստանի հավաքականի գլխավոր մարզիչ Արթուր Պետրոսյանը նախ առաջ նշեց, որ թիմը անկախ բոլոր գործոններից ինչպես միշտ դուրս է գալու խաղադաշտ հաղթելու համար իսկ Դանիայի ընտրանու գլխավոր մարզիչ Ագե Հարեյդեն նշեց, որ հաջողության հասնելու համար նախ պետք է վնասաերծել Հենրիխ Մխիթարյանին:
Սեպտեմբերի 1-ին երկու թիմերն էլ ընտրական հանդիպում են անցկացրել: Հայաստանի հավաքականը վերջին րոպեներին, գնդակ բաց թողնելով, պարտվեց Ռումինիայի ընտրանուն, իսկ Դանիայի հավաքականը սեփական հարկի տակ 4:0 խոշոր հաշվով հաղթանակի հասավ խմբի առաջատար Լեհաստանի թիմի նկատմամբ: Չնայած պարտությանը, մեր թիմի մարզիչը կարծում է, որ տղաները պատրաստ են առաջիկա խաղին:
«Իհարկե, հոգեբանական ծանր հարված է վերջին րոպեներին գնդակ բաց թողնելն ու պարտվելը, բայց կարծում եմ՝ այդ պարտությունից հետո մեր ֆուտբոլիստները հոգեբանորեն վերականգնվել են»- նշեց Արթուր Պետրոսյանը:
Հայաստանի հավաքականը Տարոն Ոսկանյանի հեռացումից հետո որոշակի խնդիրներ կարող է ունենալ կենտրոնական պաշտպանի դիրքում, քանի որ Ոսկանյանը որակազրկված է ու չի կարող մասնակցել առաջիկա խաղին:
Այս առումով մեր թիմի գլխավոր մարզիչն ընդգծեց. «Ոսկանայանի որակազրկումն ու Հրայր Մկոյանի բացակայությունն էլ վնասվածքի պատճռով մեծ հարված է մեզ համար: Բայց բոլոր իրավիճակներից էլ ելք կա, ու հուսով եմ մենք էլ կգտնենք այդ ելքը»:
Իր հերթին էլ Դանիայի հավաքականի գլխավոր մարզիչ Ագե Հարեյդեն ընդգծեց, որ շատ լավ ծանոթ են Հայաստանի հավաքականին.
«Առաջին անգամ չէ, որ մրցում ենք հայերի հետ: Տեխնիկապես լավ պատրաստված ու պայքարող թիմ է: Բայց առաջատարն, անկասկած, Հենրիխ Մխիթարյանն է, ու նրա խաղից շատ բան է կախված: Մեզ համար շատ կարևոր խաղ է, մեկնարկային կազմի հետ կապված կկողմնորոշվենք միայն վաղը»:
Հավելենք, որ ընտրական E խմբում առաջատարը Լեհաստանի հավաքականն է, որը յոթ խաղից հետո ունի 16 միավոր: Դանիայի ընտրանին նույնքան խաղերից հետո երեք միավորով է զիջում աառաջատարին: Իսկ Հայաստանի հավաքականը վեց միավորով հինգերորդ տեղում է:
