Աշխարհում կան բազում գովազդատուներ, որոնք սոցիալական ցանցերի օգտատերերին առաջարկում են գումար վաստակել։ Այդ առաջարկը հետաքրքրում է Instagram-ում գրանցված աղջիկներից շատերին, հատկապես եթե նրանք ԱՄՆ-ից են, Եվրոպայից կամ Ռուսաստանից։
Իսկ այդ մշակույթը որքա՞ն է զարգացած Հայաստանում։ Սկսենք նրանից, որ մեր երկրի շուկան փոքր է, ու այդքան էլ մեծ չէ այն գեղեցկուհիների թիվը, որոնց կարելի է բլոգեր անվանել։
Մեկ այլ խնդիր էլ կա. ոչ բոլոր մոդելները, դերասանուհիները, հաղորդավարուհիները կամ քիչ թե շատ հայտնի բլոգերներն են մտածում իրենց էջը կոմերցիոն նպատակով օգտագործելու մասին։
Ինչպե՞ս է դա արվում Արևմուտքում։ Ըստ ավանդույթի՝ գրավիչ աղջիկն էջ է բացում Instagram-ում, հիշվող ու որակյալ լուսանկարներ է տեղադրում, հետաքրքիր գրառումներ է թողնում։ Այդպիսի ակտիվ էջերը գրեթե իսկույն հայտնվում են գովազդատուների և մոդելային գործակալությունների (և ոչ միայն նրանց) ուշադրության կենտրոնում։
Instagram-ում մի քանի գեղեցիկ հայ աղջիկների էջեր գտանք ու որոշեցինք փորձի համար իմանալ՝ պատրա՞ստ են արդյոք նրանք գովազդ տեղադրել իրենց էջերում։
Պարզվեց, որ հայ գեղեցկուհիները հիմնականում նախընտրում են իրենց անձնական էջերում զարդերի գովազդ տեղադրել (հատկապես` արծաթյա, ընդ որում`տեղական արտադրանք)։
Նամակագրության արդյունքում պարզեցինք, որ հայ գեղեցկուհիներն իրենց էջում գովազդային գրառում կտեղադրեն միջինը 100 դոլարով։ Այսինքն` նրանք այդ գնով պատրաստ են լուսանկար կամ տեսանյութ հրապարակել, որում կներկայանան հայկական հայտնի ապրանքանիշներից մեկի հագուստով, կկրեն կամ կցուցադրեն տարբեր զարդեր։
Արևմտյան հայտնի բլոգերները Instagram-ում հրապարակած մեկ գրառման դիմաց վաստակում են միջինը 300 դոլար։ Այդ գումարը կախված է նրանց հետևորդների քանակից։ Օրինակ` 100 000 և ավելի հետևորդ ունեցող բլոգերները կարող են մեկ գրառման դիմաց նույնիսկ 800 դոլար վաստակել։ Իսկ եթե լսարանը 1000 հոգուց պակաս է, ապա լավագույն դեպքում՝ 100 դոլար։
Իսկ Հայաստանում գովազդատուներն իրենց ավելի պասիվ են դրսևորում։ Ոչ պաշտոնական գնահատականների համաձայն՝ այս ոլորտում տեղաշարժ կարող է լինել առաջիկա 1-1,5 տարվա ընթացքում։
