Չի բացառվում, որ հետաքննությանը հաջորդեն ընկերության բարձրաստիճան ներկայացուցիչների քրեական հետապնդումները, քանի որ Իսրայելն օրենքով արգելում է իր քաղաքացիներին անմիջական մասնակցություն ունենալ ռազմական գործողությունների։
Սակայն այլ հարց էլ կա։ Պարզվում է, որ ստեղծված իրադրությունը հետարքրքել է նաև արևմտյան ԶԼՄ-ներին, որոնցից մեկն էլ ամերիկացի քաղաքագետ Սամուել Հանթինգտոնի հիմնած Foreign Policy-ն է։
Այս լրատվամիջոցն իր ընթերցողներին շատ հանգամանորեն ներկայացրել է Իսրայելի քաղաքացիների մասնակցությամբ դեպքը։ Ավելին` շեշտել է, որ խնդիրը ոչ միայն իրավաբանական, այլ նաև տնտեսական կողմ ունի։ Պատմել է, որ Ադրբեջանն անօդաչու թռչող սարքեր մատակարարելու մասին 20 միլիոն դոլարի համաձայնագիր է կնքել Aeronautics-ի հետ։ Իսկ երբ պաշտպանության նախարարությունը սառեցրել է ընկերության արտոնագիրը (ԱԹՍ-ներ վաճառելու վերաբերյալ), կորպորացիայի բաժնետոմսերի գինը 17 տոկոսով ընկել է։
Միաժամանակ անհասկանալի է` Aeronautics կորպորացիան որքան ապրանք է հասցրել մատակարարել գնորդին սկանդալից առաջ…
Ավելին` հոդվածագիրը, չգիտես ինչու, ուշադրությունը սևեռում է Aeronautics ընկերության տեսակետի վրա, ըստ որի` ռազմական սարքերի արտադրության և մատակարարման արտոնագիրն ընդամենը ժամանակավորապես է սառեցվել, մինչև հետաքննության ավարտը… Հասկանալի է, որ Aeronautics-ի ներկայացուցիչներն իրենց հաճախորդներին հենց այդպես պետք է բացատրեին մատակարարումների ընդհատումը։
FP-ն գիտակցաբար խուսափում է որևէ մեկնաբանություն անել այն կապակցությամբ, թե ինչպես կվարվի Պաշտպանության նախարարությունը, եթե ռազմական գործողություններում իսրայելցի մասնագետների մասնակցության փաստը հաստատվի։ Ո՞վ և ինչպե՞ս է պատժվելու։
Դեռ հարց է, թե ինչ է լինելու 20 միլիոն դոլար արժեցած պատվերի հետ։ FP-ն այս մասին նույնպես լռում է, թեև, ըստ տրամաբանության, պատվերը պետք է չեղյալ հայտարարվեր։ Սակայն հոդվածագիրն այս թեման ընդհանրապես չի շոշափում, ինչը զարմանալի է, հատկապես եթե հաշվի առնենք, թե ինչ հանգամանորեն է քննել Aeronautics —ի արտոնագրի ժամանակավոր սառեցման շուրջ ստեղծված իրավիճակը։
Այս ամենը թույլ է տալիս եզրակացնել, որ իսրայելական նախարարությունը պարզապես պատրաստվում է արտոնագիրը (դրա հետ մեկտեղ նաև պատվերի մնացած մասը) փոխանցել մեկ այլ ընկերության։
Հոդվածի հեղինակն այնքան ջանասիրաբար է խուսափում հենց այս հարցից, որ հասկանալի է դառնում` նրանք, ովքեր զբաղվում են այս դեպքով, հենց այդպես էլ պատրասվում են վարվել։
Իսկ իսրայելական արտադրության «կամիկաձե» ԱԹՍ-ների կիրառումն ամենաողբերգական դրվագներից է եղել Արցախի քառօրյա պատերազմում, երբ այդ մոդելի դրոնը խոցեց ուղևորատար ավտոբուսը։ 8 զոհ ունեցանք…
Իրականում Aeronautics-ի արտադրած «Օրբիտեր 1К»-ն («կամիկաձե») իսկապես լուրջ վտանգ է ներկայացնում, քանի որ փոքր չափերն ու գրոհի ժամանակ ավելի քան 4 կիլոմետանոց բարձրություն զբաղեցնելու կարողությունը գրեթե անհնարին է դարձնում անօդաչուի հայտնաբերման ու գրոհի պահին պաշտպանական քայլեր ձեռնարկելու հնարավորությունը։
