ԵՐԵՎԱՆ, 1 սեպտեմբերի — Sutnik. ՀՀ Կենտրոն և Նորք-Մարաշ վարչական շրջանների ընդհանուր իրավասության դատարանում շարունակվեց Նորք-Մարաշի «բանդայի» գործով դատավարությունը: Այսօրվա դատական նիստին գործով ամբաստանյալ Վահան Շիրխանյանի պաշտպան Հայկ Ալումյանը միջնորդություն ներկայացրեց Շիրխանյանի հանդեպ խափանման միջոց կիրառված կալանքը վերացնելու կամ գրավով ազատ արձակելու վերաբերյալ:
«Իմ պաշտպանյալի կալանավորման հարցը ենթակա է վերանայման, և մի շարք գործոններ պետք է հաշվի առնել՝ տարիքը, նա 70 տարեկան է, ունի լուրջ առողջական խնդիրներ, իսկ կալանավորված լինելու ընթացքում ենթարկվել է վիրահատության»,- ասաց պաշտպանը:
Մեղադրող դատախազն առարկեց, դատարանը մերժեց միջնորդությունը:
Հիշեցնենք, որ մեղադրական եզրակացության համաձայն` Վահան Շիրխանյանը, Արթուր Վարդանյանը և մյուս 18 ամբաստանյալները մեղադրվում են զինված խումբ կազմակերպելու ու դրան անդամակցելու համար։
Խմբում ներգրավված անձինք ձերբակալվել էին 2015թ. նոյեմբերի 25-ին` ՀՀ ազգային անվտանգության ծառայության աշխատակիցների իրականացրած հատուկ գործողության արդյունքում։
