«Ղեկավարների հետ ունեցած անձնական լարվածությունն իր դերը կխաղա, և շատ փոքր է հավանականությունը, որ ես նշանակվեմ այդ պաշտոնում։ Դիմում գրելու իմաստ չեմ տեսնում։ Այդ հիմնարկում սուբյեկտիվությունն այնքան շատ է, որ ես ինձ ավելի կցածրացնեմ, եթե գնամ դիմում գրեմ»,- Sputnik Արմենիային ասաց Մանթաշյանը։
Նարեկ Մանթաշյանը ՀՀ ԳՆ ՍԱՊԾ Երևանի սահմանային հսկիչ կետի պետի թափուր պաշտոնի համար հայտարարված մրցույթից առաջ հայտարարություն էր տարածել` նշելով, որ որոշել է մասնակցել մրցույթին ի հեճուկս ՍԱՊԾ ներկայիս ղեկավարների։
Նշենք, որ ՍԱՊԾ «Գոգավան» սահմանային հսկիչ կետի արդեն նախկին պետ Նարեկ Մանթաշյանը դատի է տվել ՍԱՊԾ-ին՝ պահանջելով անվավեր ճանաչել իրեն աշխատանքի ազատելու հրամանը։
Նա ավելի վաղ դիմել էր ՀՀ վարչապետ Կարեն Կարապետյանին՝ խնդրելով միջամտել իր հանդեպ կատարված անօրինականությունը պարզելու գործին և վերականգնել իր աշխատանքային իրավունքները: Նա դեռ մայիսին մասնակցել էր Քաղխորհրդի կազմակերպած ծառայության ՍԱՊԾ «Գոգավան» սահմանային հսկիչ կետի պետի համար անցկացված մրցույթին, որին մասնակցել էր նաև այդ պաշտոնը պայմանագրային հիմունքներով զբաղեցնող Արտակ Թաթոյանը: Մանթաշյանը հաղթել էր, սակայն, վերջինիս խոսքով, ՍԱՊԾ պետի խորհրդական Եղիշե Մարգարյանը բանավոր հայտնել է, թե «մարդկային տեսանկյունից դա նորմալ չէ, և այդ տեղն Արտակ Թաթոյանինն է»։
