ԵՐԵՎԱՆ, 1 սեպտեմբերի — Sputnik. Գյումրու Ռուսթավելի փողոցում շինարարական ակտիվ աշխատանքներ են ընթանում, նույնիսկ ասում են՝ շինարարները երեք հերթափոխով են աշխատում ժամանակացույցի մեջ տեղավորվելու համար: Սեպտեմբերի 1-ին Գյումրի այցելած ՀՀ վարչապետ Կարեն Կարապետյանը լրագրողների հետ զրույցում նշեց, որ փողոցի շինարարական աշխատանքները, հնարավոր է, ավարտվեն ոչ թե սեպտեմբերի 1-ին, ինչպես նախապես էր ասվել, այլ ավելի ուշ։
«Շինարարներն ասում են` բավական դժվար աշխատանքներ են, կարող է հոկտեմբերի 1-ին չհասցնեն ավարտել»,- ասաց վարչապետը։
ՀՀ վարչապետը խոստացել է Գյումրին զբոսաշրջության կենտրոն դարձնել, խոստումն այսօր էլ կրկնեց՝ «Կումայրի» արգելոցի վերականգնման ծրագիրը շարունակական կլինի:
«Մենք պետք է փաստենք՝ Գյումրու նման ներուժ զբոսաշրջության համար մենք շատ չունենք, և մենք հետևողականորեն շարունակելու ենք այս ծրագիրը»,- ասաց Կարապետյանը:
Նշենք, որ Ռուսաթավելի փողոցը կառուցվում է «Կումայրի» արգելոցի վերականգնման ծրագրի շրջանակում։ Շինարարական աշխատանքների ավարտից հետո փողոցը քաղաքում եզակի է լինելու. վերգետնյա կոմունիկացիոն համակարգ չի ունենալու, բոլորը լինելու են ստորգետնյա:
Այս փողոցին ուղղահայաց՝ Շիրազի փողոցի վերջնամասում (Ջիվանի 79) գտնվող երկհարկանի կառույցում ևս շինարարական ակտիվ աշխատանքներ են ընթանում: Գյումրու քաղաքապետ Սամվել Բալասանյանին պատկանող գարեջրի գործարանի դիմաց գտնվող այս շինությունն էլ՝ նախկին «Ջրահարս» ռեստորանը, ՀՀ վարչապետ Կարեն Կարապետյանին է պատկանում. Գյումրիում զբոսաշրջությունը զարգացնելու նպատակով վարչապետն իր անձնական միջոցներով էր ձեռք բերել այս կառույցը:
