ԵՐԵՎԱՆ, 31 օգոստոսի — Sputnik. Վարչապետ Կարեն Կարապետյանն այսօր կառավարության նիստում առողջապահության նախարար Լևոն Ալթունյանին հանձնարարեց բուժհաստատություններում ավելացնել թափանցիկությունն ու գումարների բաշխման արդյունավետությունը։ Խնդիրն այն է, որ տարիներ շարունակ հիմնականում աշնանային եռամսյակում մարդիկ դիմում են բուժհաստատություններ պետպատվերից օգտվելու համար և ստանում նույն պատասխանը` պետպատվերը սպառված է։
Կառավարության նիստից հետո Լևոն Ալթունյանը բացեց չակերտները։
«Վարչապետի հանձնարարականներից մեկը ներքին աուդիտի կազմակերպումն է, դա նշանակում է, որ արդեն իսկ 2018 թվականի ապրիլին բուժհաստատությունները պետք է ներկայացնեն 2017 թվականի ֆինանսական տարվա արտաքին աուդիտի արդյունքները։ Սա նշանակում է ավելի բարձր ֆինանսական դիսցիպլինա և զգոնություն»,- ասաց Լևոն Ալթունյանը։
Մյուս հանձնարարականը վերաբերում էր պետպատվերի բաշխման բանաձևին։ Այսինքն` եթե բնակչությունը հաճախ է այցելում որոշակի բուժհաստատություններ և այնտեղ ձեռք բերում վճարովի ծառայություններ, պետպատվերն առաջին հերթին կբաշխվի հենց այդ հաստատություններում։ Այլ կերպ ասած` գնահատվում է բուժհաստատության մատուցած որակն ու այն հանգամանքը, թե որքանով է հասարակությունը նախընտրում հենց դրա մատուցած ծառայությունը։
«Այսօր 159 բուժհաստատություն կա, որն օգտվում է պետպատվերից։ Խորվաթիայում, որը 2 անգամ մեծ է Հայաստանից, այդպիսի հիվանդանոցների թիվը 57-ն է»,- ասաց նախարարը։
Լևոն Ալթունյանը չմոռացավ ընդգծել, որ նախարարությունը գտնվում է առողջապահական ոլորտի բարեփոխումների շրջանում, իսկ անցումային փուլերը բարդ ընթացք են ունենում։
