ԵՐԵՎԱՆ, 31 օգոստոսի — Sputnik. Մինսկի խմբի ամերիկացի նորանշանակ համանախագահ Էնդրյու Շոֆերն առաջին անգամ խոսել է ղարաբաղյան հակամարտության կարգավորման մասին: Այս մասին գրում են ադրբեջանական լրատվամիջոցները։
«Ցանկանում եմ, որ առաջին իսկ հնարավորության դեպքում նախագահները հանդիպելու համաձայնություն տան, կենտրոնանան դրական ֆոնով բանակցությունների վրա՝ խաղաղ կարգավորման գործընթացում առաջընթաց ունենալու համար: Հասկանում եմ, որ չափազանց բարդ հարցեր կան, որոնք պետք է քննարկել: Բայց հավատում եմ, որ կարգավորումը հնարավոր է: Որպեսզի դա տեղի ունենա, Ադրբեջանի և Հայաստանի նախագահները նախ և առաջ պետք է քաղաքական կամք դրսևորեն, ինչը կարևոր է տարածաշրջանում խաղաղության հասնելու համար: Այս հակամարտությունը շատ երկար է ձգվում»,- ասել է Շոֆերը։
Համանախագահը մեծ պատիվ է համարել համանախագահի պաշտոն ստանձնելը։
«Ես անհամբերությամբ սպասում եմ, որ առաջին իսկ հնարավորության դեպքում այցելեմ տարածաշրջան և հանդիպումներ ունենամ կողմերի պաշտոնական դեմքերի հետ: Ես նաև անհամբերությամբ սպասում եմ ՄԽ իմ գործընկեր համանախագահների հետ սեպտեմբերին Նյու Յորքում կայանալիք հանդիպմանը»,- ասել է նա:
Դիվանագետն ընդգծել է նաև, որ Միացյալ նահանգները դիրքորոշում չի փոխում և հավատարիմ է հակամարտությունը խաղաղ կարգավորելու սկզբունքին:
«ԱՄՆ-ն աջակցում է մինսկյան գործընթացին և կաջակցի խաղաղության համաձայնագրի բանակցություններին, որոնք հիմնված կլինեն Հելսինկյան եզրափակիչ ակտում ներառված երեք սկզբունքների՝ ուժի չկիրառման, տարածքային ամբողջականության և ինքնորոշման, վրա»,-ասել է Շոֆերը:
