ԵՐԵՎԱՆ, 31 օգոստոսի — Sputnik. Ադրբեջան «Իսկանդերի» մատակարարումները կարող են նոր պատերազմի հանգեցնել, ինչում Ռուսաստանը հետաքրքրված չէ, Sputnik Արմենիային ասաց Ռազմավարության ու տեխնոլոգիաների վերլուծության կենտրոնի տնօրեն, «Սպառազինության փորձագետ» ամսագրի հրատարակիչ Ռուսլան Պուխովը։
Երբ Ռուսաստանի Ռազմատեխնիկական համագործակցության դաշնային ծառայությունը հայտնեց, որ արտասահմանյան գործընկերներից մի քանի հայտ է ուսումնասիրում` «Իսկանդեր» համալիրի մատակարարման վերաբերյալ, ադրբեջանական լրատվամիջոցներից մեկում հրապարակումներ հայտնվեցին, որ համալիրի հնարավոր ստացողներից մեկը կարող է Բաքուն լինել։
«Ադրբեջանի ռազմատեխնիկական քաղաքականությունը շատ փակ է, նույնիսկ ավելի փակ` քան Հայաստանինը։ Սակայն ինձ քիչ հավանական է թվում, որ Ռուսաստանը Ադրբեջանին «Իսկանդեր» տար», – ասաց Պուխովը։
Նրա խոսքով` գլխավոր պատճառն այն է, որ Երևանի ու Բաքվի միջև ուժերի բալանսը վերջին տարիներին խախտվել է` Ադրբեջանի օգտին։
«Վերջին 7–8 տարվա ընթացքում Ադրբեջանը 10 անգամ ավելի շատ ներդրումներ էր անում սպառազինության մեջ, քան Հայաստանը։ Եթե Հայաստանին կրկին «Իսկանդեր» մատակարարվեր, բալանսը կվերականգնվեր։ Եթե նույնիսկ ոչ ամբողջությամբ, ապա գոնե մասամբ ուժերը կհավասարվեին։ Եթե հիմա Ադրբեջանին «Իսկանդեր» մատակարարեն, ապա այդ անհավասարությունը շատ մեծ կլինի», – ասաց Պուխովը։
Իսկ Ռուսաստանը, փորձագետի խոսքով, բնականաբար, շահագրգռված չէ պատերազմով։
Մյուս կողմից, երբ Ռուսաստանը Հայաստանին «Իսկանդեր» փոխանցեց, համոզված էր, որ Երևանը դրան «մոտ չի թողնի» ոչ վրացական, ոչ էլ իրանական զինվորականներին։
«Իսկ եթե «Իսկնդերը» ադրբեջանցիներին փոխանցեն, չի կարելի համոզված լինել, որ տեխնոլոգիան երրորդ (ամերիկացիների, իսրայելցիների – խմբ.) ձեռքերում չի հայտնվի», – կարծում է փորձագետը։
«Իսկանդերի» գինը, ըստ Պուխովի, ևս մեկ, թեև ոչ հիմնական պատճառ է։ Նրա խոսքով` հիմա Ադրբեջանն այնպիսի ռեսուրսների չի տիրապետում, որոնք այն ուներ, երբ նավթն ավելի թանկ էր։
