ԵՐԵՎԱՆ, 30 օգոստոսի — Sputnik. Բլոգինգն այն տեսքով, ինչպիսին կար 2005-2010 թվականներին, վերացել է, կարծում է տեղեկատվական անվտանգության փորձագետ Սամվել Մարտիրոսյանը։ Այս մասին նա ասաց Բլոգի միջազգային օրվա կապակցությամբ Sputnik Արմենիա մամուլի կենտրոնում կազմակերպած Երևան–Բիշքեկ–Բաքու–Քիշնև–Մինսկ տեսակապի ժամանակ։
«Բլոգինգը հետխորհրդային տարածքում մեկնարկեց LiveJournal–ով (բլոգային հարթակ առցանց օրագրերի համար)։ Այնտեղ կային բոլորը, բայց այսօր այնտեղ մարդ չկա։ Վաղուց է սպառել իրեն, պարզապես նրանք, ովքեր այնտեղ հիմա գրում են, չեն կռահում այդ մասին։ Իմ կարծիքով` բլոգինգը նույնպես սպառել է իրեն, համենայնդեպս, այն բլոգինգը, որը կար 2005-2010 թվականներին, երբ զարգացում էր ապրում LiveJournal–ը, Wordpress–ը և այլն», – ասաց նա։
Փորձագետի խոսքով` բլոգինգը բնորոշվում էր մի քանի չափորոշիչով, որոնք այժմ չկան։ Այն է` մեծ, հասկանալի տեքստեր և լսարան, որը կարող էր կարդալ ու մեկնաբանել այդ տեքստերը։
«Ինձ թվում է` սոցցանցերը փոխեցին լսարանն ու հեղինակներին։ Այսօրվա դրությամբ ոչ միայն շատ քիչ հեղինակներ կան, որոնք կարող են երկու–երեք պարբերությունից շատ տեքստ գրել, այլև գրեթե չկան մարդիկ, որոնք կարող են մեծ տեքստեր կարդալ», – նշեց Մարտիրոսյանը։
Նրա հաշվարկներով` այսօր սոցցանցի օգտատերերի 98%–ն անմիջապես փակում է երկար գրառումներ ունեցող էջերը։ Փորձագետի կարծիքով` բլոգինգն ավելի «դասական» հասկացությամբ մնացել է միայն մասնագիտական ոլորտներում, երբ հեղինակները գրում են նեղ մասնագիտական թեմաների մասին (օրինակ` տեղեկատվական անվտանգության կամ ատոմային էլեկտրակայանների)։ Նման գրառումներ ընթերցում են մարդկանց նեղ շրջանակները։ Մինչդեռ մեծ հեղինակություն են վայելում մաշկի խնամքի կամ ճիշտ makeup անելու մասին կարճ տեսանյութերը։
«Մյուս կողմից, այսօր մենք կոնտենտի այլ տեսակ ունենք` տեսաբլոգ, թարթիչների աճեցման մասին տեսանյութեր Instagram–ում։ Մարդիկ ավելի մեծ հաճույքով դիտում են հեղինակների` YouTube–ում հրապարակված մտորումները, քան կարդում դրանք երկու–երեք էջի վրա շարադրած տեսքով։ Բլոգինգը սպառել է իրեն, բարի գալուստ նոր բլոգինգ», – ասաց փորձագետը։
Տեսակապի մասնակիցները քննարկեցին նաև գրաքննության խնդիրը։ Այս կապակցությամբ բլոգեր Նուրայ Ռիսկուլովը իր տեսակետը հայտնեց` յուրաքանչյուր հեղինակ պետք է հասկանա իր արտահայտությունների պատասխանատվության աստիճանը, եթե նա բաժանորդների մեծ բանակ ունի։
