ԵՐԵՎԱՆ, 26 օգոստոսի — Sputnik. Հայկական ծագում ունեցող հայտնի ռուսաստանցի դիմահարդար Գոհար Ավետիսյանը Տաշքենդում յուրահատուկ արտաքինով աղջիկների է փնտրում իր վարպետության դասընթացներին մասնակցելու համար։
Ավետիսյանի Instagram-ի էջում, որին գրանցված է շուրջ 4 մլն օգտատեր, աղջիկների և կանանց փնտրելու մասին հայտարարություն է տեղադրված: Նշված է, որ նրանք ինքնատիպ նշաններ պետք է ունենան իրենց մարմնի վրա՝ պիգմենտացիաներ, բնածին խալեր, անհաջող տատուաժներ, դեմքի վրա առկա սպիներ, հոնքերի մասնակի կամ լրիվ բացակայություն։
Տաշքենդում անցկացրած վարպետության դասընթացի ժամանակ Գոհար Ավետիսյանը խոստացել է, որ կպատմի ոչ միայն կատարյալ դիմահարդարման գաղտնիքների մասին, այլև կկիսվի Instagram-ում իր բլոգը զարգացնելու գաղափարներով։
Դասընթացին կարող են մասնակցել ինչպես դիմահարդարներն, այնպես էլ գեղեցիկ դիմահարդարման սիրահարները։
Գոհար Ավետիսյանը հայտնի դարձավ աղջիկներին դիմահարդարման միջոցով անճանաչելի կերպարանափոխելու իր աշխատանքների շնորհիվ:
Նրա որոշ հերոսուհիներ նույնիսկ իրենք իրենց անմիջապես չեն ճանաչում նոր կերպարում։ Հաճախ դիմահարդարն օգնում է կերպարանափոխվել մաշկի խնդիրներ կամ արտասովոր արտաքին ունեցող աղջիկներին։
