Դիանա Հարությունյան, Sputnik.
ԱԺ «Ելք» խմբակցության ղեկավար Նիկոլ Փաշինյանը ֆեյսբուքյան իր էջում ներկայացրել է Երևանի փողոցներն անվանափոխելու տարբերակները։ Երևանի ավագանու մյուս անդամ կուսակցություններից ևս հետաքրքրվեցինք՝ ինչպես են արձագանքելու նշված առաջարկներին:
Ոչ կոսմետիկ փոփոխություններին: «Երկիր Ծիրանին» հենց այսպես է պատասխանում առաջարկող փոփոխություններին: Ավելին` դեմ լինելով բոլշևիկներին ու նրանց կառավարման տարիների գործողություններին, բոլորովին այլ՝ կոնտր առաջարկություն են պատրաստվում ներկայացնել ավագանուն:
«Մենք կարծում ենք` Երևանում պետք է տեղադրել Վուդրո Վիլսոնի արձանն ու նրա անունով փողոց ունենալ։ Սա ցույց է տալիս կոնկրետ ուղղություն: Կոսմետիկ փոփոխություններ պետք չեն քաղաքին»,– ասում է «Երկիր Ծիրանի» կուսակցության նախագահ Զարուհի Փոստանջյանը:
Պատեհապաշտություն. Երևանի ավագանու ՀՀԿ խմբակցության անդամ Աստղիկ Գևորգյանը մեկ բառով հենց այսպես է բնութագրում «Ելքի» առաջարկը: Ավելին`առաջարկում է մտածել 6 փողոցների անվանակոչության հետ կապված պետական ծախսերի մասին:
«Անգամ գերմանացիներն իրենց թույլ չտվեցին այդպիսի ծախսեր ժամանակին: Մինչև հիմա Բեռլինում չկա Գերմանական փողոց: Բացի այդ, դեմ եմ քաղաքական գործիչների անուններով փողոցներին: Եթե փոխել, ապա պատմական այնպիսի դեմքերի անուններով, ովքեր որևէ ժամանակի մեջ կասկածի չեն ենթարկվի»,– ասում է Աստղիկ Գևորգյանը:
«Ելքից» նշում են` անգամ Հանրապետականն է խոստովանել, որ պետք է փոխել, օրինակ, Ֆրունզեի փողոցը: Իրենց փոփոխությունների առաջարկով, օրինակ, այդ փողոցը կարելի է կոչել Ապրիլյան Հերոսների փողոց: Երևանի ավագանու «Ելք» խմբակցության ղեկավար Դավիթ Խաժակյանը կարևորում է բոլոր առաջակների ընդունումը, բայց այս մեկից էլ դժգոհ չեն լինի:
«Մենք արդեն ներկայացրել ենք: Հարցն օրակարգում է ու ընթացք, անպայման, կստանա: Ինչպես կավարտվի, ցույց կտա ժամանակը»,-մեկնաբանում է Խաժակյանը:
Հիշեցնենք՝ «Ելքն» առաջարկում է Երևանի Կասյան փողոցն անվանափոխել Վազգեն Առաջին Վեհափառի անունով, Անաստաս Միկոյան փողոցը` Քըրք Քըրքորյանի, Ֆրունզե փողոցն`Ապրիլյան Հերոսների փողոց, իսկ Ամիրյան փողոցն անվանափոխել Վռամշապուհ արքայի անունով։
Առաջարկի համաձայն` Երևանի Լենինգրադյան փողոցը պետք է անվանափոխվի Լեոնիդ Ազգալդյանի անունով, Իսակովի պողոտան Լենինգրադյան փողոցին միացնող փողոցը` Մոնթե Մելքոնյանի անունով։
