ԵՐԵՎԱՆ, 28 օգոստոսի– Sputnik. Առաջին անգամ չէ պայթյուն որոտում Նաիրիտում: 2006 թ․սեպտեմբերի 23-ին ևս Նաիրիտում տեղի էր ունեցել պայթյուն։ Հետաքննությունը պարզել էր, որ գործարանի սարքերում մի շարք անհետևողականություններ են եղել:
Սեպտեմբերի 14-22-ի ընթացքում գործարանում տեղի էր ունեցել քլորոպրենի թորում։ Արդյունքում կուտակվել էին 6,1 մ³ անօգուտ քլորոպրեն և 143 մ³ քլորոպրենի օրգանական թափոն, որոնք հավաքվել և դրվել էին վտանգավոր, ոչ-սառեցված գոտում։
Գործարանի փորձագետները որոշել էին թափոնների ամանները մնացորդների հետ խառնել և վառել։ Արդյունքում ստեղծվել էր պայթուցիկ նյութ։
Այդ օրվա պայթյունի պատճառով տուժել էր 4 աշխատող, վնասվել 7 ավտոմեքենա։ Ու սա դեռ ամենը չէր. ջրամատակարարման համակարգի վնասը կազմել էր 6,5 միլիոն դրամ, ևս 6,5 միլիոն դրամի վնաս էր հասցվել Երևան-Մեղրի ճանապարհային հատվածին։ Շրջակա միջավայրին հասցված վնասը 1,5 միլիոն դրամ էր կազմում։ Աղետի վայրում վնասվել էին նաև բնակելի տներ։
Գործարանի երեք աշխատողներ՝ Սմբատ Ղազարյանը, Հովհաննես Հովհաննիսյանը և Մերուժան Գրիգորյանը մեղավոր ճանաչվեցին պայթուցիկ նյութերի անվտանգության չափերի խախտման համար` ըստ ՀՀ Քրեական 231 օրենքի 2-րդ մասի:
2009 թվականի մայիսի 14 –ն էր։ Լուր տարածվեց, որ Երևանի «Նաիրիտ» քիմիական գործարանի քլորոպրենի արտադրամասում պայթյուն է տեղի ունեցել: Պայթյունն այնքան ուժգին էր եղել, որ լսվել էր մի քանի կիլոմետր հեռավորության վրա: Հարվածի ուժգնությունից թափվել էին մոտակա շինությունների ապակիները: Ցավոք, այս անգամ առանց զոհերի չավարտվեց։ Զոհվել էր գործարանի 4 աշխատակից։
Դեպքի վայր ժամանած 15 հրշեջ խմբերին հաջողվել էր մոտ մեկ ժամվա ընթացքում տեղայնացնել կրակն ու գրեթե մարել հրդեհը: Բարեբախտաբար, կատարվածն այս անգամ շրջակա միջավայրի և բնակչության առողջության համար վտանգ չէր ներկայացնում:
Երևանի «Նաիրիտ» արհեստական կաուչուկ արտադրող գործարանը, հիմնվել է Խորհրդային Հայաստանում, 1940 թվականին: Գործարանը նախկին ԽՍՀՄ երկրներին և ներքին շուկային մատակարարել է մոտ 34 տեսակի քիմիական արտադրանք։
«Նաիրիտ» փակվել է 1989 թվականին` բնապահպանական նկատառումներով։ Այն մասամբ վերագործարկվել է 1992 և 1993 թվականներին։
2006 թվականի օգոստոսի 18-ին Ռայնովիլ Փրոփըրթի Լիմիթիդ միջազգային ընկերությունը 40 միլիոն դոլարով գնել է «Նաիրիտ» գործարանի 90% բաժնետոմսերը։ Գործարանի բաժնետոմսերի մնացյալ 10%-ը պատկանում է ՀՀ էներգետիկայի և բնական պաշարների նախարարությանը։
2007 և 2008 թթ․–ներին գործարանը, համեմատած նախորդ երեք տարվա, կաուչուկի արտադրանքն ավելացրել է 20.6%-ով։
2008 թ․ նոյեմբեր 1-ի դրությամբ գործարանում աշխատում էր 2742 մարդ։ Դեկտեմբերի 1-ին, Նաիրիտը ֆինանսական ճգնաժամի պատճառով դադարեցրեց աշխատանքը, և մոտ 1500 աշխատող ազատվեց աշխատանքից։
