ԵՐԵՎԱՆ, 28 օգոստոսի — Sputnik. Օգոստոսի 28-ին Ստեփանակերտի և Սուխումի միջև ստորագրած Փոխըմբռնման մասին հուշագիրը ուղղված չէ երրորդ երկրների, մասնավորապես` Վրաստանի դեմ, Sputnik Արմենիային ասաց ԼՂՀ նախագաhի մամուլի քարտուղար Դավիթ Բաբայանը։
Օգոստոսի 28-ին Արցախի Հանրապետության արտաքին գործերի նախարար Կարեն Միրզոյանը հանդիպել է պաշտոնական այցով Ստեփանակերտ ժամանած Աբխազիայի Հանրապետության արտաքին գործերի նախարար Դաուր Կովեին: Այցի շրջանակում կողմերը «Փոխըմբռնման մասին հուշագիր» են ստորագրել Արցախի Hանրապետության և Աբխազիայի Հանրապետության արտաքին քաղաքական գերատեսչությունների միջև։
«Մենք հատուկ հարաբերություններ ունենք այն պետությունների հետ, որոնք գտնվում են ճանաչման ճանապարհին` Աբխազիայի, Հարավային Օսեթիայի, Մերձդնեստրի հետ և ոչ միայն։ Օրինակ` Բասկերի երկրի և մի շարք այլ կառույցների հետ, ինչպես նաև տարբեր երկրների վարչական միավորների հետ», – ասաց Բաբայանը։
Նրա խոսքով` համաշխարհային ճանաչմանն ուղղված քաղաքականություն է իրականացվում տարբեր մակարդակներում` մունիցիպալ կառույցներից մինչև պետական կառույցներ։
Ինչպես նշեց Բաբայանը, Ղարաբաղը ճանաչել են Կալիֆոռնիայի նահանգը, Լոս Անջելես քաղաքը, Բասկերի երկիրը, և բնականաբար, չճանաչված պետությունները։
«Մենք համագործակցում ենք նրանց հետ` կարևորելով այդ համագործակցությունը։ Առաջին հերթին, մեր խնդիրներն են նմանատիպ, երկրորդը` մեր հարաբերությունները բազմադարյա պատմություն ունեն և թվագրվում են պատմական Հայաստանի և Աբխազական թագավորության տարիներով։ Բացի այդ, Աբխազիայում մեծ հայկական համայնք կա։ Հուշագիրը ռազմական բաղկացուցիչ չունի, խոսքը քաղաքական և մշակութային ոլորտներին է վերաբերում», – ասաց Բաբայանը։
Նրա խոսքով` հայ համայնքի առկայությունը թույլ է տալիս կոմպլեմենտար քաղաքականություն վարել և հարաբերություններ հաստատել բոլոր երկրների հետ` անկախ առանձին պետությունների միջև առկա հակասությունների։
«Օրինակ` մենք լավ հարաբերություններ ունենք Ռուսաստանի և ԱՄՆ–ի հետ։ Մենք պարտավոր ենք լավ հարաբերություններ պահպանել բոլոր այն երկրների հետ, որտեղ հայկական համայնք կա։ Դա վերաբերում է ինչպես Աբխազիային, այնպես էլ Վրաստանին։ Առավել ևս, որ մեր կապերն ուղղված չեն որևէ պետության դեմ, այդ թվում և Վրաստանի», – ասաց Բաբայանը։
Հուշագրի շրջանակում կողմերը պայմանավորվել են, մասնավորապես, խորհրդատվություններ անցկացնել տեղեկատվական ու հասարակական-փորձագիտական փոխգործակցության, միջպետական, միջկառավարական և միջգերատեսչական համագործակցության զարգացման, երիտասարդական քաղաքականության և դիվանագիտության գծով համագործակցության և այլ հրատապ օրակարգային հարցերի շուրջ։ Ըստ հուշագրի՝ նախատեսվում է նաև ծրագրերի իրականացում փորձի փոխանակման և դիվանագետների վերապատրաստման ոլորտներում։
