ԵՐԵՎԱՆ, 25 օգոստոսի — Sputnik. «Տրուդ» թերթի բուլղարացի թղթակից Դիլյանա Գայտանջիևային հեռացրել են աշխատանքից այն բանից հետո, երբ նրան Բուլղարիայի ազգային անվտանգության գործակալությունը հարցաքննել է ահաբեկիչներին գաղտնի զենքի մատակարարման հետ կապված։
Ավելի վաղ Դիլյանա Գայտանջիևայի ձեռքում փաստաթղթեր էին հայտնվել, որոնք հրապարակել էր «Տրուդ» թերթը։ Այդ փաստաթղթերը վկայում են, որ «Մետաքսե ճանապարհ» ադրբեջանական ավիաընկերությունն, դիվանագիտական անձեռնմխելիության շղարշի տակ, Բուլղարիայից ու Արևելյան Եվրոպայից աշխարհով մեկ ահաբեկչական կազմակերպություններին զենք է մատակարարում, այդ թվում` «Իսլամական պետությանը» (արգելված է որոշ երկրներում – խմբ.) ։
«Ես համոզված եմ, որ բուլղարական իշխանությունները ճնշում գործադրել թերթի վրա։ Նրանք ուզում են կանգնեցնել ինձ, բայց չեն կարողանա։ Ես կշարունակեմ հետաքննությունն ու հետ չեմ կանգնի», – ասաց Գայտանջիևան Sputnik Արմենիային։
Գայտանջիևայի խոսքով` հարցաքննումից մի երկու օր հետո նա պետք է Սիրիա մեկներ` աշխատանքը շարունակելու։ Աշխատանքի վայրում նա որևէ խնդիր չուներ։
Սակայն, հարցաքննությունից մի քանի ժամ անց նրան ասացին, որ հեռացված է «Տրուդ» թերթում աշխատանքից։
«Խմբագրությունում ինձ որևէ պարզաբանում չտվեցին։ Նրանք պարզապես հեռացրեցին ինձ աշխատանքից։ Առանց բացատրությունների», – ասաց Գայտանջիևան։
Հրապարակման մեջ նաև նշվում է, որ 2016 թվականին Ադրբեջանը մեղադրել է Հայաստանին Արցախում տեղի ունեցող մարտերի ընթացքում «սպիտակ ֆոսֆորի» օգտագործման մեջ, մինչդեռ, իրականում, ինչպես ենթադրվում է, Բաքուն է ձեռք է բերել հարյուրավոր տոննա «սպիտակ ֆոսֆոր»։ Փաստաթղթերը ցույց են տալիս, որ այդ նյութն իբր Ադրբեջան է ներմուծվել 2016 թվականին։
Sputnik Արմենիան հարցում է ուղարկել «Տրուդ» թերթի խմբագրություն, սակայն հոդվածի հրապարակման պահին դեռևս պատասխան չէր ստացել։
