ԵՐԵՎԱՆ, 25 օգոստոսի — Sputnik. WorldSkills ազգային օպերատորները Հայաստանում, Ռուսաստանում, Բելառուսում ու Ղազախստանում այսօր` օգոստոսի 25-ին, նոր WorldSkills Eurasia կառույցի ստեղծման մասին հռչակագիր են ստորագրել, ըստ որի` հնարավոր կլինի զարգացնել այս երկրների կադրային ներուժը։ Այս մասին հայտնում է WorldSkills Russia մամուլի ծառայությունը։
Որոշումը կայացվել է այսօր Աստանայում անցկացվող Եվրասիական շաբաթվա ընթացքում։
Նախաձեռնողները կարծում են, որ չորս հարևան երկրների ավելի սերտ կոոպերացումը կադրային ներուժի զարգացման հարցում կօժանդակի աշխատանքի արտադրողականության աճին և Եվրասիական տարածքի բոլոր քաղաքացիների պրոֆեսիոնալ իրացմանը
Փաստաթուղթը ստորագրվել է WorldSkills International-ի նախագահ Սայմոն Բարթլիի ներկայությամբ:
Նոր միավորման հետ համագործակցելու է 12 երկիր` Ադրբեջանը, Աֆղանստանը, Իրանը, Պակիստանը, Մոնղոլիան, Մոլդովան, Հնդկաստանը, Չինաստանը, Ղրղըզստանը, Տաջիկստանը, Թուրքմենստանը, Ուզբեկստանը։
Նոր կառույցը կդառնա WorldSkills International-ի վեցերորդ մակրոտարածաշրջանային միավորումը: Ավելի վաղ ստեղծվել են WorldSkills Americas-ը, ASEAN-ը, GCC-ը, Oceania-ն և Europe-ը: Խնդիրների իրագործման հարցում WorldSkills Eurasia-ին կօգնեն միջկառավարական մարմիններն ու կազմակերպությունները, ինչպիսիք են Եվրասիական տնտեսական միությունը, Եվրասիական տնտեսական հանձնաժողովը, Եվրասիական զարգացման բանկը և Շանհայի համագործակցության կազմակերպությունը:
ԵԱՏՄ երկրները մտադիրն են մասնագիտական հմտությունների գնահատականի միասնական համակարգ կիրառել ռուսական FutureSkills նախաձեռնության շրջանակում։ Բացի հռչակագրից, եվրասիական երկրները ստորագրել են համագործակցության ավելի մանրամասն համաձայնագիր: Մասնավորապես, ենթադրվում Է, սահմանել պրոֆեսիոնալ ունակությունների գնահատման միասնական համակարգ, որը կճանաչվի բոլոր երկրների տարածքում։
