ԵՐԵՎԱՆ, 17 օգոստոսի — Sputnik. ՀՀԿ խոսնակ Էդուարդ Շարմազանովը կասկածում է, որ «Ելք» դաշինքն ԱԺ-ում հանդես կգա ԵԱՏՄ-ից դուրս գալու նախաձեռնությամբ։
«Ես պաշտոնապես չեմ լսել և չեմ կարդացել, որ «Ելք» դաշինքը պատրաստ է որպես դաշինք ներկայացնել օրենսդրական նախաձեռնություն Հայաստանի` ԵԱՏՄ-ից դուրս գալու ուղղությամբ։ «Ելք» դաշինքից մեկ կուսակցություն կա, որը ո՛չ նախընտրական, ո՛չ հետընտրական փուլում նման կարծիք չի հայտնել։ Եթե «Հանրապետություն» և «Լուսավոր Հայաստան» կուսակցություններն իրենց առաջնորդների և ակտիվիստների մակարդակով հայտնել են իրենց տեսակետը, ապա «Քաղաքացիական պայմանագիր» կուսակցությունից ես չեմ լսել հստակ դիրքորոշում` նրանք կո՞ղմ են, թե՞ դեմ ԵԱՏՄ-ին»,- ասաց ՀՀԿ խոսնակը։
Ինչ վերաբերում է խորհրդարանական մեծամասնությանը, ապա ՀՀԿ-ի տեսակետն անփոփոխ է մնացել` Հայաստանի անդամակցությունը ԵԱՏՄ-ին արդարացված է և արդյունավետ։
«Եթե մենք չմտնեինք ԵԱՏՄ, Հայաստանի բանջարեղենը`լոլիկն ու վարունգը, Փարիզո՞ւմ պիտի վաճառեինք, Հայաստանի կոնյակը, որ Եվրոպայում բրենդի է կոչվում, պետք է Ֆրանսիայո՞ւմ կամ Մեծ Բրիտանիայո՞ւմ վաճառեինք։ Մենք միացել ենք 180 մլն-անոց շուկայի, որը մեզ զարգացման մեծ հնարավորություն է տալիս», —ասաց Շարմազանովը։
ՀՀԿ խոսնակը բարձրացված հարցն «արհեստական օրակարգ» որակեց և խոստացավ` աշնանն առավել ամբողջական կներկայացվի, թե ինչ է տվել Հայաստանին ԵԱՏՄ անդամակցությունը։
