ԵՐԵՎԱՆ, 24 օգոստոսի — Sputnik. «Խոսրովի անտառ» արգելոցի 300 հա տարածքում ԱԻՆ, ԲՆ և գյուղնախարարության անտառտնտեսության շուրջ 80 աշխատակից դեռ շարունակում է հերթապահել` կանխելու համար հրդեհի նոր հնարավոր բռնկումը։
Այս մասին այսօր կառավարության նիստի ավարտին լրագրողներին հայտնեցին երեք գերատեսչությունների ղեկավարները։
ԱԻ նախարար Դավիթ Տոնոյանը ասաց, որ անտառի առանձին հատվածներում դեռ կան ծխացող օջախներ, որոնք կարող են հրդեհի նոր բռնկման հանգեցնել, ուստի համապատասխան մասնագետներն այդ տեղանքում 24-ժամյա հերթապահություն են իրականացնում։
Պատասխանելով հասարակական շրջանակներում ու մամուլում հնչած մեղադրանքներին, թե Խոսրովի հրդեհը մեծ մասշտաբներ ընդունեց պատասխանատուների ոչ ճիշտ աշխատանքի արդյունքում`ԱԻ նախարարը նշեց, որ անհրաժեշտ արձագանքը եղել է անմիջոպես, գուցե որոշ կազմակերպչական դժվարություններ եղել են, պայմանավորված այն հանգամանքով, որ Խոսրովից առաջ երկու օր շարունակ փրկարարների ուժերը կենտրոնացած էին Վայոց Ձորի Արտավանի անտառում։
Բնապահպանության նախարար Արծվիկ Մինասյանն էլ նշեց, որ սա Հայաստանի համար այդ մասշտաբի հրդեհի դեմ պայքարի առաջին փորձն էր, որն ի հայտ բերեց որոշ տեխնիկական զինվածության ու պատրաստվածության խնդիրներ։
Նախարարը հայտնեց, որ պատահածից ելնելով`որոշում է կայացվել ձեռք բերել որոշ հակահրդեհային տեխնիկական անհրաժեշտ միջոցներ։
«Աշխարհում ամենաշատ դրամաշնորհներն ուղղվում են հենց բնապահպանության ոլորտին։ Մենք արդեն քննարկում ենք այս դրամաշնորհային ծրագրերով հակահրդեհային և առհասարակ աղետների դեմ պայքարի ավելի նորարար միջոցներ ձեռք բերելու հնարավորությունը»,– ասաց Մինասյանը։
Ինքնաթիռ առայժ ձեռք չի բերվի, ավելացրեց ԱԻ նախարարը. դրա համար գումար չկա, ռազմավարական առաջնահերթությունների մեջ էլ ներառված չէ։
Ինչ վերաբերում է ռուսական ինքնաթիռին, Դավիթ Տոնոյանը հայտարարեց` ռուսական կողմին աջակցության դիմաց գումար չի վճարվել։ Առայժմ դրամական խրախուսում չեն ստացել նաև հրդեհաշիջմանը մասնակցած փրկարարները։ Բայց նախարարը խոստացավ` կստանան սեպտեմբերի 4-ին` մասնագիտական տոնի առթիվ։
Բնապահպանության նախարարն էլ իր ոլորտի աշխատակիցներին կխրախուսի։ Բայց կլինեն նաև պատժվողներ, երբ պարզվի, թե ում մեղքով է հրդեհվել արգելոցը։
Իսկ քանի դեռ հարուցված քրեական գործի շրջանակներում իրավապահները փորձում են պարզել հրդեհի պատճառը, Գյուղատնտեսության նախարարության «Անտառի մոնիթորինգ» կենտրոնի աշատակիցները Խոսրովի անտառում օդային հետախուզություն են իրականացնում` պարզելու հրդեհի հասցրած իրական վնասը։
Գյուղատնտեսության փոխնախարար Աշոտ Հարությունյանի խոսքով` հրդեհից տուժել է Խոսրովի արգելոցի 1600 հա–ից շուրջ 1000–ը։ Բայց խիստ վնասված հատվածը նախնական տվյալներով շուրջ 250 հա է։
«Այս ընդհանուր թվի մեջ ներառված է նաև ծանրության թեթև աստիճանի այրված 437 հա, շատ թույլ աստիճանի այրում` 355 հա, իսկ ծանրության բարձր աստիճանի այրումը կազմել է 204 հա»,– պարզաբանեց Աշոտ Հարությունյանը։
Այրվել են հիմնականում գիհու անտառատարածքներ, ոչնչացել են կրծողներ ու սողուններ։ Կաթնասունների տուժելու փաստեր չեն հայտնաբերվել։ Ինչ վերաբերում է բնական տարածքից հեռացած կենդանիներին, մասնագետները հույս ունեն, որ դրանք տեղափոխվել են անվտանգ վայրեր և չեն բացառում, որ վաղ թե ուշ կվերադառնան։
