ԵՐԵՎԱՆ, 24 օգոստոսի — Sputnik. Հայաստանը, որն իր համար ընտրել է Ռուսաստանի հետ մերձենալու ուղին, այսօր ավելի լավ է պաշտպանված, քան, օրինակ, հարևան Վրաստանը, որը միտված է դեպի Արևմուտք։ The Armenian interest առցանց պարբերականին տված հարցազրույցում նման կարծիք է հայտնել ամերիկացի փիլիսոփա և քաղաքագետ, «Պատմության ավարտը ու վերջին մարդը» քաղաքական և փիլիսոփայական գրքի հեղինակ Ֆրենսիս Ֆուկույաման։
«Եթե պարզվի, որ Միացյալ Նահանգները վստահելի գործընկեր չէր, Վրաստանը դժվարությունների առաջ կկանգնի։ Այդ առումով դուք ավելի շատ եք պաշտպանված, և ձեր երկիրը պակաս խոցելի է, քան Վրաստանը», – իր տեսակետն է հայտնել Ֆուկույաման։
Ամերիկացի քաղաքագետի կարծիքով` Հայաստանի գլխավոր ներքաղաքական խնդիրն այն է, որ պետական ինստիտուտները կատարյալ չեն։ Իսկ կոռուպցիան ու պրոտեկցիոնիզմը լուրջ վտանգ են ներկայացնում երկրի համար։
Ֆուկույաման կարծում է, որ Հայաստանի արդիականացման և դեմոկրատացման հարցում առանցքային դեր կարող է ունենալ սփյուռքը։ Այն կարող է թարմ գաղափարներ ու այլընտրանքային մոտեցումներ առաջարկել։ Որպես օրինակ Ֆուկույաման նշել է հետխորհրդային Էստոնիան. էստոնացի փախստականներից շատերը, որոնք որոշակի հաջողությունների են հասել արտերկրում, վերադարձել են հայրենիք, որտեղ արդեն գերիշխում էր ժողովրդավարական հասարակությունը։
«Սփյուռքը կարևոր դեր է խաղում և կարող է մարդկային կապիտալի, ռեսուրսների և գիտելիքի լավ աղբյուր լինել», – ասել է Ֆուկույաման։
Մի շարք երկրներ կախում ունեն արտերկրում բնակվող և աշխատող իրենց քաղաքացիների եկամուտներից, և եթե նրանք հայրենիք վերադառնան, ապա իրենց երկրների զարգացման ուղղված ներդրումը բավականին զգալի կլինի, նշել է ամերիկացի քաղաքագետը։
Էսիխիրո Ֆրենսիս Ֆուկույաման Սթենֆորդի համալսարանի ժողովրդավարության, զարգացման և իրավունքի գերակայության հարցերով կենտրոնի ավագ գիտաշխատող է։ Ճանաչում է ստացել քաղաքական փիլիսոփայության մասին գրված գրքերի, ինչպես նաև համաշխարհային բեսթսելեր դարձած «Պատմության ավարտը ու վերջին մարդը» գրքի շնորհիվ։ Մեսենջերյան դասախոսությունների և քաղաքական գիտությունների ոլորտում Յուհան Շյուտեի անվան մրցանակների դափնեկիր է։
