ԵՐԵՎԱՆ, 24 օգոստոսի— Sputnik. Հայաստանի և Ռուսաստանի նախագահների` Սոչիում կայացած բանակցությունների թեմաներից մեկը եղել է Թուրքիայի հայտարարությունը` ԵՏՄ–ի հետ հարաբերությունները խորացնելու մասին, Sputnik Արմենիայի մամուլի կենտրոնում ասաց քաղտեխնոլոգ Վիգեն Հակոբյանը Sputnik Արմենիա միջազգային մամուլի կենտրոնում կայացած տեսակապի ընթացքում։
«Աշխատանքային հանդիպում էր, ոչ մի արտառոց բան։ Երկրները ռազմավարական դաշնակիցներ են, և պարբերաբար հանդիպումներ են տեղի ունենում։ Դատելով սուղ տեղեկատվությունից` մի շարք ռազմավարական բնույթի հարցեր են քննարկվել։ Հանդիպումներն, իհարկե, կարևոր են։ Կարծում եմ` քննարկվել է նաև Ղարաբաղյան կարգավորման հարցը», – ասաց Հակոբյանը։
Փորձագետը կարծում է, որ Ալիևի հետ հանդիպումից հետո Պուտինը հանդիպեց նաև Սարգսյանի հետ` այդպիսով որոշակի պարիտետ պահպանելով։
Հակոբյանը նաև ուշադրություն հրավիրեց Թուրքիայի էկոնոմիկայի նախարարի վերջին հայտարարությանը` ԵԱՏՄ–ի հետ հարաբերությունների խորացման վերաբերյալ։ Քաղտեխնոլոգի կարծիքով` քննարկվել է նաև այդ թեման։
«Դեռ այդքան էլ պարզ չէ` Հայաստանին այդ հարցը շա՞տ է հետաքրքրում կամ անհանգստացնում,», – ասաց Հակոբյանն` ավելացնելով, որ Ռուսաստանին հետաքրքրում են տարածաշրջանում առկա աշխարհատնտեսական նախագծերը։
Խոսքը Իրանի, Վրաստանի հետ գազային նախագծերի մասին է։ Բացի այդ, Հայաստան էր այցելել նաև Թուրքմենստանի նախագահը, և այդ այցը նույնպես դրա հետ է կապված։
«Բոլորս քաջ գիտակցում ենք, որ լինելով Ռուսաստանի ռազմավարական դաշնակից, Հայաստանն իր քաղաքականությունը մի շարք հարցերում համաձայնեցնում է ՌԴ–ի հետ», – նշեց Հակոբյանը` ենթադրելով, որ որոշակի պայմանավորվածություններ արդեն ձեռք են բերվել։
Եվրասիական փորձագիտական ակումբի համակարգող, «Ինտեգրացիա և զարգացում» ՀԿ նախագահ Արամ Սաֆարյանը հիշեցրեց, որ Ռուսաստանի և Հայաստանի նախագահները ընդգծել են ռուս–հայկական ռազմավարական գործընկերության և դաշնակցայի հարաբերությունների կարևորությունը։
Հայաստանը գտնվում է բարդ տարածաշրջանում, որտեղ հակամարտություններ են ընթանում (Իրաք, Սիրիա, Ղարաբաղ)։ Արտաքին մարտահրավերների ֆոնին, Սաֆարյանի խոսքով, կարևոր է փաստել, որ երկու երկրներ դաշնակցային հարաբերություններ ունեն։
«Հանդիպման ընդհանուր պատկերը դրական էր։ Հարաբերությունները բարձր մակարդակի վրա են, այդ պատճառով կողմերը կարող են անկաշկանդ քննարկել բոլոր կարևոր հարցերը», – ասաց Սաֆարյանը` ավելացնելով, որ կողմերն իսկապես քննարկելու բան ունեն, քանի որ ռազմատեխնիկական համագործակցությունը, ՀԱՊԿ–ին և ԵԱՏՄ–ին անդամակցելը հանդիպումների ու բոլոր հարցերի վերաբերյալ բանակցությունների անցկացումն անհրաժեշտ է դարձնում։
Քաղաքագետ Արմեն Գասպարյանն էլ նշեց, որ արևմտյան մամուլը հաճախ է խոսում այն մասին, թե իբր երկու երկրների միջև հարաբերությունները վատացել են։
«Լիովին պարզ դարձավ, որ դա իրականությանը չի համապատասխանում։ Երկրներին միմյանց հետ իսկապես կապում են ոչ միայն պատմական, այլև, առաջին հերթին, քաղաքական, տնտեսական և ռազմատեխնիկական ոլորտում վերջին 20 տարիների համագործակցությունը», – ասաց Գասպարյանը։
Նրա խոսքով` ամենակարևորը հիմա տնտեսական ոլորտն է։
«ԵԱՏՄ–ին անդամակցելու վերաբերյալ հասարակության մեջ լուրջ բանավեճեր ծավալվեցին, սակայն տնտեսության աճի ցուցանիշներն արժանի պատասխան դարձան հոռետեսների համար»,– նշեց Գասպարյանը։
Նրա կարծիքով` բավականաչափ զարգացած չէ փոխգործակցությունը մարդասիրական ոլորտում։
Քաղաքագետը նաև անդրադարձավ Թուրքիայի հայտարարությանը, ըստ որի` երկիրը ցանկանում է միանալ ԵԱՏՄ–ին։ Փորձագետի կարծիքով` դա բավականին բարդ գործընթաց է, որոշումը պետք է համաձայնեցվի բոլոր շահագրգիռ կողմերի և, առաջին հերթին, Հայաստանի հետ։
«Թուրքիան վերջին ամիսների ընթացքում հաճախ էր վիճում եվրոպական երկրների հետ, դա կարող է ցուցադրական ժեստ լինել Թուրքիայի կողմից։ Իբր չեք ցանկանում մեզ ընդունել ԵՄ, մենք կգնանք դեպի Եվրասիական ինտեգրացիա», – նշեց Գասպարյանն` ընդգծելով, որ այս քաղաքականությունը որևէ կերպ չի համապատասխանում Էրդողանի` նոր Աթաթուրք դառնալու ձգտմանը, այդ իսկ պատճառով Անկարայի հայտարարությունն անլուրջ է թվում։
