ԵՐԵՎԱՆ, 23 օգոստոսի – Sputnik, Գոհար Սարգսյան. Թուրքմենստանի նախագահի հայաստանյան այցի շրջանակում նախատեսված են նրա հանդիպումները ՀՀ բարձրագույն ղեկավարության հետ:
Հանրապետության նախագահի նստավայրում հայ-թուրքմենական բարձր մակարդակի բանակցությունների ավարտին նախատեսվում է փաստաթղթերի ստորագրման արարողություն:
Նախագահներ Սերժ Սարգսյանը և Գուրբանգուլի Բերդիմուհամեդովը ԶԼՄ-ների առջև հանդես կգան բանակցությունների արդյունքներն ամփոփող հայտարարություններով: Այս մասին տեղեկացնում է նախագահի մամուլի ծառայությունը։
Նշենք, որ 2015 թվականի դրությամբ ստորագրվել է հայ-թուրքմենական 42 համաձայնագիր։
Առաջին անգամ պետական այցով Թուրքմենստան է ժամանել ՀՀ 1–-ին նախագահ Լևոն Տեր–Պետրոսյանը, 1993 թվականին, հաջորդը` 1997 թվականին էր։
2000 թվականին ՀՀ 2–րդ նախագահ Ռոբերտ Քոչարյանն է այցելել Թուրքմենստան, 2001 թվականին արդեն պաշտոնական այցով Հայաստան է ժամանել Թուրքմենստանի այդ օրերի նախագահ Սափարմուրադ Նիազովը։
2010 թվականի նոյեմբերի 25–-ին տեղի է ունեցել նախագահ Սերժ Սարգսյանի հանդիպումը Թուրքմենստանի նախագահ Գուրբանգուլի Բերդիմուհամեդովի հետ, որին հետևել է նախագահների մասնակցությամբ երկու երկրների պաշտոնական պատվիրակությունների ընդլայնված կազմով հանդիպումը, ստորագրվել են տարբեր ոլորտներում համագործակցության հաստատմանն ուղղված փաստաթղթեր:
2012 թվականի նոյեմբերի 29–-ին նախագահ Սերժ Սարգսյանի հրավերով պաշտոնական այցով Երևան է ժամանել Թուրքմենստանի նախագահ Գուրբանգուլի Բերդիմուհամեդովի գլխավորած պատվիրակությունը:
Հանդիպման ժամանակ տնտեսական հարցերից բացի Սերժ Սարգսյանն ընդգծել է Հայաստանի սկզբունքային դիրքորոշումը Լեռնային Ղարաբաղի խնդրի կարգավորման հարցում:
2014 թվականի ապրիլի 8-ին Թուրքմենստանի նախագահի նստավայրում տեղի է ունեցել պաշտոնական այցով Թուրքմենստան ժամանած նախագահ Սերժ Սարգսյանի դիմավորման պաշտոնական արարողությունը, որից հետո մեկնարկել են նախագահ Սերժ Սարգսյանի և Թուրքմենստանի նախագահ Գուրբանգուլի Բերդիմուհամեդովի երկկողմ, ապա երկու երկրների պաշտոնական պատվիրակությունների մասնակցությամբ ընդլայնված ձևաչափով բանակցությունները:
Հայ-թուրքմենական բարձր մակարդակի բանակցությունների արդյունքներով ստորագրվել են Հայաստանի և Թուրքմենստանի միջև համագործակցության զարգացմանը և խորացմանը վերաբերող մի շարք փաստաթղթեր։
1993 թվականից Թուրքմենստանում բացվել է հայկական դեսպանատունը։
Հայ-թուրքմենական հարաբերություններն առավել սերտ են եղել 90–ականներին, երբ Հայաստանը Թուրքմենստանից գազ է գնել։
