«Առավոտ». Ենոքավանի թոռներն ու ծոռները որոշել են գյուղը զարգացնել
Թերթի դիտարկմամբ` արտագաղթը, որն արդեն տարիներ շարունակ դատարկում է հայկական գյուղերը, շրջանցում է Ենոքավանը։
«Բանն այն է, որ այս գյուղի` արտերկրում բնակվող թոռներն ու ծոռները որոշել են պապենական գյուղում ներդրումներ անել և գյուղը զարգացնել, տուրիստական կենտրոն դարձնել։ Գյուղն այսօր ներգաղթ ունի։ Գալիս են Ֆրանսիայից, Իրանից, Ռուսաստանից։ Երիտասարդները վստահեցնում են` եթե իրենց բոլոր նախագծերը կյանքի կոչվեն, տուրիստների թիվը կարճ ժամանակում ոչ թե կկրկնապատկվի, այլ կհնգապատկվի»,-գրում է թերթը։
«Հայկական ժամանակ». Տրանսպորտում երաժշտություն չի հնչի
Երևանյան գործող հանրային տրանսպորտում երաժշտություն չպետք է հնչի։ Այս մասին ասված է Երևանի ավագանու «Ելք» խմբակցության անդամ Արայիկ Հարությունյանին տրամադրված փաստաթղթում։
Օրենքի այս դրույթը լիարժեք վերականգնելու համար օգոստոսի 10-ին նա դիմել էր Տարոն Մարգարյանին և դրական պատասխան ստացել։ «Համապատասխան աշխատակիցներն այդ ուղղությամբ իրականացնելու են վերահսկողություն։
«Երևանտրանս» ՓԲԸ ղեկավարության կողմից ուղևորափոխադրումներ իրականացնող բոլոր տնտեսվարող սուբյեկտների տնօրեններին հանձնարարվել է վարորդական անձնակազմին հրահանգավորել տրանսպորտային միջոցներում բացառել երաժշտություն միացնելու դեպքերը»,-գրում է թերթը։
«Հրապարակ». Ալիկ Արզումանյանն այս գիշեր մեկնում է Դանիա՝ ստանձնելու դեսպանի պարտականությունները
Թերթը գրում է, որ հուլիսի կեսին 2 նախկին պատգամավոր դեսպան նշանակվեց: Մեկը Լևոն Մարտիրոսյանն է, մյուսը` Ալիկ Արզումանյանը։
«Լևոն Մարտիրոսյանը՝ շոումեն Գարիկ Մարտիրոսյանի եղբայրը, դեսպան նշանակվեց Կանադայում, նախկին արտգործնախարար, ՀՀՇ անդամ Ալիկ Արզումանյանը՝ Դանիայում: Մենք տեղեկացանք, որ Արզումանյանն այս գիշեր մեկնում է Դանիա՝ ստանձնելու դեսպանի պարտականությունները: Իսկ Լևոն Մարտիրոսյանը մեզ ասաց, որ Կանադա է մեկնելու սեպտեմբերի 1-ին: Կանադայի իշխանություններին իր հավատարմագրերը կհանձնի սեպտեմբերի կեսերին, որից հետո կստանձնի դեսպանի պարտականությունները: Մինչ այդ նա դեռ Երևանում է, պետք է ընդունի Հայաստան ժամանող կանադական պատվիրակությանը»,-գրում է թերթը:
