ԵՐԵՎԱՆ, 23 օգոստոսի — Sputnik. Հայաստանի հետ սահմանին` Նախիջևանում, անցկացվել են ադրբեջանական Սու-25 գրոհիչ ինքնաթիռների ուսումնամարզական թռիչքները։ Այս մասին հայտնում է ՌԻԱ Նովոստին։ Չորեքշաբթի` օգոստոսի 23-ին, Ադրբեջանի ռազմական գերատեսչության կայքէջում զորավարժությունների մասին տեսանյութ էր հրապարակվել։
Ադրբեջանի ՊՆ մամուլի ծառայությունը հայտնում է, որ Նախիջևանում անցկացվել են Հատուկ ավիացիոն զորամասի Սու-25 գրոհիչ ինքնաթիռների ուսումնամարզական թռիչքները։ Ադրբեջանի ԶՈՒ-ն հայտնում է, որ զորավարժությունները բավականին հաջող են ընթացել։
Մեկնաբանության համար Sputnik Արմենիան դիմեց ՀՀ պաշտպանության նախարարության մամուլի խոսնակ Արծրուն Հովհաննիսյանին։
«Ցանկացած թռչող սարք, Ադրբեջանի կատարած ցանկացած զորավարժություն ցանկացած ծավալով մեր ուշադրության կենտրոնում է, ամեն ինչին հետևում ենք»,- ասաց Հովհաննիսյանը։
Ըստ տարածված տեղեկության` արդիականացված ռուսական գրոհիչ ինքնաթիռները նախատեսված են ցամաքային զորքերի աջակցման համար ինչպես ցերեկային, այնպես էլ գիշերային ժամերին` մարտի դաշտում թիրախի ուղիղ տեսանելիության պարագայում։ Ինքնաթիռը համալրված է թնդանոթներով, ավիառումբերով, կառավարվող և չկառավարվող հրթիռներով։
