ԵՐԵՎԱՆ, 21 օգոստոսի — Sputnik. Աշխարհի գավաթը հավակնորդների մրցաշարի վերջին հնարավորությունն է, և դրանից պետք է օգտվել։ Լևոն Արոնյանն այս մասին ասել է chess-news-ին։
«Դա մեծ մարտահրավեր է, իսկ ես սիրում եմ մարտահրավերները»,- ասել է գրոսմայստերը։
Ինչ վերաբերում է ամերիկյան Սենթ Լուիսում կայացած մրցաշարին, ապա Արոնյանը խոստովանել է, որ հերքել է կարծիքն այն մասին, թե ինքն ուժեղ չէ արագ ու կայծակնային շախմատում։
«Եթե որևէ մեկը մտածում էր, թե ես այդքան էլ ուժեղ չեմ արագ և կայծակնային շախմատում, ապա ես հերքեցի այդ տեսակետը։ Ամեն դեպքում, Թբիլիսիում անցկացվող մրցաշարի իմ մրցակիցները լրջորեն կմտածեն կարճ ոչ-ոքիներ հայտարարելուց առաջ»,- ասել է նա։
Արոնյանը պատասխանել է նաև «Սենթ Լուիսի հաղթանակն արդյո՞ք հարսանեկան նվեր կդառնա հարսնացուին» հարցին։
«Աշխարհում չկան այնպիսի հաղթանակեր, որոնք կկարողանան արժանի նվեր լինել նրան, ում սիրում եմ ես»,- ասել է շախմատիստը chess.com-ին։
Grand Chess Tour-ի ընդհանուր հաշվարկում Լևոն Արոնյանը երրորդ տեղում է։ Մրցաշարի եզրափակիչը փուլը կկայանա դեկտեմբերին Լոնդոնում։
