ԵՐԵՎԱՆ, 20 օգոստոսի — Sputnik. Սիրիայի մայրաքաղաք Դամասկոսում հրթիռակոծության է ենթարկվել միջազգային ցուցահանդեսի անցկացման տարածքը, ինչի հետևանքով մահացել է 4 և տուժել առնվազն 4 մարդ: Այս մասին տեղեկացնում է ՌՒԱ Նովոստին:
Հայտնում են, որ հրթիռային արկը կիրառվել է Դամասկոսի հարևանությամբ գտնվող Արևելյան Գուպայի զինված խմբավորումների կողմից:
Միջազգային այս ցուցահանդեսին մասնակցում է 43 երկրի ներկայացուցիչ, այդ թվում՝ Ռուսաստանը, Չինաստանը, Գերմանիան, Ֆրանսիան և Մեծ Բրիտանիան, Հայաստանը, Բելառուսը և այլն:
Ինչպես նշել է Սիրիայում ցուցահանդեսների և միջազգային շուկայի գլխավոր տնօրեն Ֆարես Ալ-Կիրտլին, չնայած Դամասկոսի հանդեպ կիրառվող եվրոպական սանկցիաներին, այս միջոցառմանը ներկայացված են նաև բազմաթիվ եվրոպական ընկերությւոններ:
Նշենք, որ ՀՀ արտգործնախարարությունը տեղեկացրել էր, որ Դամասկոսի միջազգային ցուցահանդեսին մասնակցում է նաև Հայաստանը, որի տաղավարը ներկայացնում է Սիրիայում ՀՀ դեսպանությունը` ՀՀ առևրտաարդյունաբերական պալատի և Սիրիա-հայկական գործարար խորհրդի հետ համագործակցությամբ։
Տաղավարի այցելուներին ներկայացվում է ՀՀ տնտեսությունը և զարգացման հեռանկարները, երկրում իրականացվող ներդրումային քաղաքականությունը, ինչպես նաև տրամադրվում տեղեկատվություն հիմնական արտադրողների, այդ թվում սննդամթերքի և ջրի, քարի արդյունահանման և վերամշակման, ոսկերչության և բարձր տեխնոլոգիաների և այլ ոլորտներում աշխատող ընկերությունների մասին։
